Autoritetet gjermane po hetojnë një burrë saudit me një histori të retorikës anti-islame si autor i dyshuar në një sulm me makinë në një treg Krishtlindjesh në qytetin Magdeburg, i cili vrau pesë persona, thanë zyrtarët të shtunën, shkruan Reuters.
Sulmi i së premtes në mbrëmje ndaj turmës së vizitorëve në panair, ku ishin mbledhur për të festuar sezonin para Krishtlindjeve vjen në mes të një debati të ashpër mbi sigurinë dhe emigracionin gjatë fushatës zgjedhore në Gjermani, ku e djathta ekstreme po bën përparime të forta.
“Çfarë veprimi i tmerrshëm është të plagosësh dhe vrasësh kaq shumë njerëz atje me një brutalitet të tillë,” tha kancelari Olaf Scholz në qytetin qendror, pjesë e ish-Gjermanisë Lindore, ku vendosi një trëndafil të bardhë në një kishë në nder të viktimave.
“Tani kemi mësuar se mbi 200 persona janë lënduar”, shtoi ai.
“Pothuajse 40 janë lënduar aq rëndë sa duhet të shqetësohemi shumë për ta”.
Një mjek saudit 50-vjeçar, i cili ka jetuar në Gjermani për gati dy dekada, u arrestua në vendngjarje. Policia kontrolloi shtëpinë e tij gjatë natës.
Motivi mbeti i paqartë dhe policia ende nuk e ka identifikuar të dyshuarin. Ai është përmendur në mediat gjermane si Taleb A.
Një zëdhënës i një klinike të specializuar rehabilitimi për kriminelët me varësi të ndryshme në Bernburg, konfirmoi se i dyshuari kishte punuar si psikiatër për ta, por nuk kishte qenë në punë që nga tetori për shkak të sëmundjes dhe pushimeve.
Postimet në llogarinë e tij X, të verifikuara nga Reuters, treguan mbështetje për partitë anti-islamike dhe të së djathtës ekstreme, duke përfshirë Alternativën për Gjermaninë (AfD), si dhe kritika ndaj Gjermanisë për trajtimin e refugjatëve sauditë.
Ministrja e Brendshme gjermane Nancy Faeser tha se islamofobia e të dyshuarit ishte e qartë, por ajo nuk pranoi të komentojë mbi motivin.
Taleb A. u shfaq në një numër intervistash në media në vitin 2019, duke përfshirë gazetën gjermane FAZ dhe BBC, në të cilat ai foli për punën e tij si aktivist që ndihmonte arabët sauditë dhe ish-muslimanët të iknin në Evropë.
“Nuk ka islam të mirë”, tha ai për FAZ në atë kohë.
Një burim saudit i tha Reuters se Arabia Saudite kishte paralajmëruar autoritetet gjermane për sulmuesin pasi ai postoi pikëpamjet ekstremiste në llogarinë e tij personale X që kërcënonin paqen dhe sigurinë.
Këto paralajmërime janë dhënë disa herë që kur ai u largua nga Arabia Saudite në vitin 2006, tha burimi, pa hyrë në hollësi të mëtejshme.
Një vlerësim i rrezikut i kryer vitin e kaluar nga hetuesit penalë shtetërorë dhe federalë gjermanë arriti në përfundimin se burri nuk përbënte “asnjë rrezik specifik”, raportoi gazeta Welt, duke cituar burime të sigurisë.
Agjencitë e inteligjencës vendase dhe të huaja të Gjermanisë kundërshtuan të komentojnë mbi hetimin në vijim.
Social Demokratët e Scholz-it janë pas si AfD-së së ekstremit të djathtë, ashtu edhe opozitës konservatore, që kryesojnë në sondazhet përpara zgjedhjeve të parakohshme të vendosura për në 23 shkurt.
AfD, e cila gëzon mbështetje veçanërisht të fortë në ish-Gjermaninë Lindore, ka udhëhequr thirrjet për një goditje ndaj emigracionit në vend.
Kandidatja e saj për kancelar Alice Weidel dhe bashkëudhëheqësi Tino Chrupalla lëshuan një deklaratë të shtunën duke dënuar sulmin.
“Sulmi i tmerrshëm në tregun e Krishtlindjeve në Magdeburg në mes të periudhës paqësore para Krishtlindjeve na ka tronditur”, thanë ata.
