Kryeministrja e djathtë e Italisë, Giorgia Meloni, tha të enjten se ndërhyrjet politike të Elon Musk kanë nxitur zemërim vetëm sepse ai nuk ishte i majtë ndërsa shtoi se të huajt kishin ndërhyrë në politikën italiane për vite me radhë.
Meloni tha se Musk po ushtronte të drejtën e tij për lirinë e fjalës. Në vend të kësaj, ajo akuzoi njerëzit e fuqishëm në të majtë për ndërhyrje politike, përfshirë financierin miliarder dhe filantropist George Soros.
Musk, një aleat miliarder i presidentit të zgjedhur të SHBA-së, Donald Trump, i cili është vendosur për një rol në administratën e ardhshme, ka provokuar zemërim në gjithë Evropën me një varg sulmesh ndaj krerëve të kontinentit, përfshirë kancelarin gjerman Olaf Scholz dhe kryeministrin e Mbretërisë së Bashkuar Keir Starmer.
Meloni hodhi poshtë një sugjerim se komentet e Musk në rrjetin e tij social X përbënin “ndërhyrje të rrezikshme”.
“Problemi është kur njerëzit e pasur përdorin burimet e tyre për të financuar partitë, shoqatat dhe eksponentët politikë në gjithë botën për të ndikuar në zgjedhjet politike të shteteve të ndryshme”, u tha Meloni gazetarëve në një konferencë vjetore për shtyp.
“Kjo nuk është ajo që po bën Musk,” këmbënguli ajo.
“Elon Musk financoi një fushatë zgjedhore në vendin e tij, për kandidatin e tij, në një sistem në të cilin, meqë ra fjala, do theksoja se kjo është mjaft e zakonshme”, tha ajo.
“Por unë nuk jam në dijeni për financimin e partive, shoqatave apo eksponentëve politikë të Elon Musk në mbarë botën. Kjo, për shembull, është ajo që bën George Soros,” tha Meloni.
“Dhe po, unë e konsideroj atë që bën Soros ndërhyrje të rrezikshme në punët e shteteve kombëtare dhe në sovranitetin e tyre,” tha ajo.
“A është problemi se Elon Musk është me ndikim dhe i pasur apo se ai nuk është i majtë?” pyeti Meloni, e cila e ka përshkruar Musk si një “gjeni”.
