Policia e Tiranës ka identifikuar dhe shpallur në kërkim 5 shtetas të dyshuar për mbajtjen të paligjshme të 21-vjeçares Sajma Qordja, e cila u gjet e mbyllur në një apartament në katin e tetë të një pallati në Astir.
Pas hetimeve të kryera nga Sektori për Hetimin e Krimeve kundër Jetës dhe Pronës, në bashkëpunim me Prokurorinë e Tiranës, janë shpallur në kërkim shtetasit: S. S. (29 vjeç), A. A. (36 vjeç), O. A. (31 vjeç), J. S. (26 vjeç) dhe A. J. (40 vjeç), të dyshuar se kanë mbajtur të mbyllur vajzën në një apartament të marrë me qira ditore.
Gjatë hetimeve, shërbimet e Policisë zbuluan gjithashtu dy armë zjarri dhe municion luftarak në një apartament tjetër, të marrë gjithashtu me qira.
Njoftimi i Policisë
Në vijim të informacionit të dhënë ditën e djeshme, për shtetasen S. Q. që kërkoi ndihmën e Policisë, ndërkohë që ndodhej në katin e tetë të një pallati në Astir, bëjmë me dije se:
Si rezultat i veprimeve hetimore të kryera nga Sektori për Hetimin e Krimeve kundër Jetës dhe Pronës, në drejtimin e Prokurorisë së Tiranës, janë identifikuar dhe shpallur në kërkim shtetasit:
S. S., 29 vjeç, A. A., 36 vjeç dhe O. A., 31 vjeç, të tre banues në Tiranë; J. S., 26 vjeç, banues në Tepelenë; dhe A. J., 40 vjeç, banues në Vlorë.
Nga veprimet e para hetimore të kryera për këtë rast dyshohet se këta shtetas, në bashkëpunim me njëri-tjetrin, kanë mbajtur të mbyllur shtetasen S. Q., në apartamentin ku ndodhej, i marrë me qira ditore.
Gjithashtu, ishte marrë me qira ditore apartamenti përballë në të cilin shërbimet e Policisë, ditën e djeshme, gjetën gjatë kontrollit, 2 armë zjarri, municion luftarak dhe sende të tjera personale që do t’i shërbejnë hetimit.
Vijon puna për kapjen e 5 shtetasve të shpallur në kërkim. Gjithashtu, vijojnë hetimet në bashkëpunim me Prokurorinë, për dokumentimin e plotë të ngjarjes dhe identifikimin e shtetasve të tjerë që mund të jenë përfshirë.
Materialet proceduriale i kaluan Prokurorisë, për veprat penale “Heqja e paligjshme e lirisë”, kryer në bashkëpunim, “Mbajtja pa leje dhe prodhimi i armëve, armëve shpërthyese dhe e municionit” dhe “Falsifikimi i dokumenteve”.
