Autoritetet detare gjermane kanë publikuar fotografi të anijes cisternë *Eventin* dhe të rimorkiatorëve të tyre gjatë operacionit të shpëtimit.
Autoritetet gjermane kanë deklaruar se një anije cisternë me naftë, e cila është bllokuar në ujërat gjermane, i përket “flotës hije” të Rusisë, që Berlini pretendon se përdoret për të shmangur sanksionet.
Autoritetet detare gjermane (CCME) thanë të premten se anija me flamur panamez, e njohur si *Eventin*, kishte humbur fuqinë dhe drejtimin, gjë që kërkoi angazhimin e rimorkiatorëve për ta stabilizuar, përcjell BBC.
Ministrja e Jashtme e Gjermanisë, Annalena Baerbock, akuzoi Moskën, duke deklaruar se, përmes “përdorimit të pamëshirshëm të një flote cisternash të ndryshkura”, presidenti rus Vladimir Putin po “anashkalon” sanksionet dhe po kërcënon sigurinë evropiane.
Rusia, e cila më parë ka refuzuar të përgjigjet ndaj akuzave se përdor një flotë hije, ende nuk ka komentuar për këtë incident.
SHBA, MB dhe BE kanë vendosur sanksione ndaj industrisë së naftës së Rusisë pas pushtimit të plotë të Ukrainës nga Rusia në vitin 2022.
Në raportin e parë për cisternën që po lundronte në ujërat gjermane, CCME tha se anija ishte 274 metra e gjatë dhe 48 metra e gjerë, duke transportuar rreth 99,000 tonë naftë.
Autoritetet detare gjermane deklaruan se cisterna po lundronte me shpejtësi të ulët në ujërat bregdetare të Detit Baltik, në veri të ishullit gjerman të Rügen-it.
Një ekip prej katër specialistësh u zbrit në anije me helikopter të premten në mbrëmje për të krijuar lidhjet e rimorkimit, të cilat më pas u siguruan. Tre rimorkiatorë morën nën kontroll “anijen e dëmtuar” që ishte “e paaftë për të lundruar”.
Autoritetet detare thanë të premten në mbrëmje se nuk ishte zbuluar asnjë rrjedhje nafte.
Në përditësimin e fundit të së shtunës pasdite, autoritetet detare gjermane deklaruan se karvani i rimorkimit rreth cisternës ishte nisur drejt Sassnitz-it, një qytet në ishullin Rügen.
Më herët, autoritetet kishin deklaruar se karvani i rimorkiatorëve që po punonin për të shpëtuar *Eventin*-in ndodhej në veri të Rügen-it dhe po lëvizte ngadalë drejt lindjes, me një shpejtësi prej rreth 2.5 km/orë.
CCME tha se kishin marrë masa sigurie për shkak të detit të trazuar, pasi zona ku ndodhej anija po përjetonte dallgë deri në 2.5 metra të larta dhe erëra të forta.
Megjithëse anija mban flamurin panamez, autoritetet gjermane kanë fajësuar Rusinë për incidentin.
“Rusia po rrezikon sigurinë tonë evropiane jo vetëm me luftën e saj të paligjshme të agresionit kundër Ukrainës, por edhe me kabllo të prera, shtylla kufitare të zhvendosura, fushata dezinformimi, pengues GPS-i dhe, siç kemi parë, cisterna nafte të rrënuara,” tha ministrja e Jashtme gjermane në një deklaratë.
Në dhjetor të vitit të kaluar, Bashkimi Evropian deklaroi se po punonte për masa, përfshirë sanksionet, për të goditur “flotën hije të Rusisë, e cila kërcënon sigurinë dhe mjedisin, ndërsa financon buxhetin e luftës së Rusisë”.
Deklaratat e bllokut evropian erdhën pasi kabllot nënujore në Detin Baltik u dëmtuan nga një anije e dyshuar, që BE beson se ishte pjesë e flotës hije të Rusisë.
Ky hap ishte një masë e mëtejshme e ndërmarrë nga vendet perëndimore për të goditur industrinë ruse të naftës si përgjigje ndaj pushtimit të plotë të Ukrainës nga Rusia.
Që nga zbatimi i masave më të ashpra të embargos për të ndaluar Rusinë nga eksportimi i naftës, besohet se Moska po përdor anije me pronësi të paqartë për të transportuar mallra – kryesisht naftë – nëpër botë.
Sipas Këshillit Atlantik, një organizatë studimore me bazë në SHBA, Rusia “po instrumentalizon flotën e errët, duke e përdorur atë veçanërisht si një mjet kryesor për eksportet e naftës”.
Flota hije, ose flota e errët, është emri i dhënë anijeve të vjetra që lundrojnë “pa sigurimet standarde të industrisë perëndimore, me pronësi të paqartë, që ndryshojnë shpesh emrat dhe regjistrimet e flamurit dhe që zakonisht operojnë jashtë rregulloreve detare”, sipas Këshillit Atlantik.
Incidenti i fundit në Detin Baltik vjen ndërsa Uashingtoni dhe Londra bashkuan përpjekjet për të sanksionuar drejtpërdrejt kompanitë energjetike *Gazprom Neft* dhe *Surgutneftegas*.
Sekretari i Jashtëm i Mbretërisë së Bashkuar, David Lammy, tha se masa për të dobësuar kompanitë ruse të naftës do të “shteronte buxhetin e luftës së Rusisë”, duke shtuar se fondet e larguara “nga duart e Putinit ndihmojnë në shpëtimin e jetëve ukrainase”.
Por *Gazprom Neft* e quajti sanksionet “të pabazuara” dhe “të paligjshme”, sipas agjencive shtetërore të lajmeve në Rusi.
Gjithashtu të premten, Departamenti i Thesarit i SHBA deklaroi se kishte sanksionuar 183 anije që janë “pjesë e flotës hije si dhe cisterna nafte të zotëruara nga operatorë flotash me bazë në Rusi”.
