Komandanti i grupit paramilitar Forcat e Mbështetjes së Shpejtë (RSF) pranoi të dielën se trupat e tij janë tërhequr nga kryeqyteti i Sudanit, Khartoum, pas gati dy vitesh kontrolli mbi qytetin gjatë luftës civile, raporton DW.
Kjo deklaratë vjen pasi ushtria sudaneze shpalli të enjten se kryeqyteti ishte “i lirë” nga kontrolli i milicive që e kishin marrë pas shpërthimit të luftës në prill 2023.
Komandanti i RSF-së, Mohammed Hamdan Dagalo, kishte deklaruar tre ditë më parë se “nuk do të ketë as tërheqje e as dorëzim”, duke këmbëngulur se trupat e tij “janë ripozicionuar” pas rimarrjes së kryeqytetit nga forcat rivale të ushtrisë.
Megjithatë, në një postim në X, Dagalo pranoi tërheqjen, por paralajmëroi: “Ju konfirmoj se ne jemi larguar nga Khartoumi, por… do të kthehemi me një vendosmëri edhe më të madhe.”
Ai gjithashtu theksoi se nuk ka negociata apo marrëveshje me ushtrinë sudaneze, duke thënë: “Ne nuk kemi asnjë marrëveshje apo diskutim me këtë lëvizje djallëzore, vetëm gjuhën e armëve.”
Kriza humanitare dhe qëndrimi i ushtrisë
Lufta ka shkaktuar krizën më të rëndë të urisë dhe zhvendosjes në botë, sipas Kombeve të Bashkuara. Më shumë se 12 milionë njerëz janë zhvendosur, dhjetëra mijëra janë vrarë, dhe në disa rajone është shpallur uri ekstreme.
Nga ana tjetër, shefi i ushtrisë sudaneze, Abdel Fattah al-Burhan, u shpreh të shtunën se nuk do të tërhiqet, pas një ofensivë të suksesshme ku ushtria rimori pallatin presidencial, aeroportin dhe pika kyçe në qendër të qytetit.
“Nuk do të falim, nuk do të bëjmë kompromis dhe nuk do të negociojmë,” deklaroi Burhan, duke shtuar se fitorja do të jetë e plotë vetëm kur “rebelët e fundit të jenë zhdukur nga çdo cep i Sudanit.”
Reagimi i SHBA-së dhe diplomacia ndërkombëtare
Sekretari Amerikan i Shtetit, Marco Rubio, deklaroi të enjten se Uashingtoni është i përkushtuar për të ndihmuar në ndërmjetësimin e paqes në Sudan. Ai tha se ka diskutuar situatën me liderë ndërkombëtarë, përfshirë presidentin kenian William Ruto dhe kryeministrin etiopian Abiy Ahmed.
Ndërkohë, SHBA ka vendosur sanksione ndaj të dyja palëve, duke akuzuar ushtrinë për sulme ndaj civilëve dhe RSF-në për “gjenocid” në rajonin perëndimor të Darfurit.
