Komisioni Evropian gjobiti të martën Shoqatën e Prodhuesve të Automobilave (ACEA) dhe 15 anëtarët e saj me një total prej 458 milionë eurosh (494.5 milionë dollarë) për përfshirje në sjellje karteliste në lidhje me riciklimin e makinave të përdorura, përcjell DW.
Gjiganti gjerman Volkswagen mori gjobën më të madhe prej 127 milionë eurosh, i ndjekur nga Renault/Nissan (81.5 milionë euro), kompania mëmë e Opel, Stellantis (75 milionë euro), Ford (41.5 milionë euro), BMW (25 milionë euro), Opel vetë (25 milionë euro) dhe Toyota (rreth 24 milionë euro). ACEA duhet të paguajë 500,000 euro.
Mercedes-Benz do të ishte gjobitur me 35 milionë euro, por shmangu ndëshkimin pasi raportoi ekzistencën e kartelit, i cili operoi midis viteve 2002 dhe 2017.
Komisioni zbuloi se prodhuesit kishin bërë marrëveshje anti-konkurruese dhe kishin shkëmbyer informacione konfidenciale për të shmangur konkurrencën në lidhje me çmontimin, skrapin dhe riciklimin e makinave të vjetra.
Një nga gjetjet kryesore ishte se ata kishin rënë dakord të mos reklamojnë përpjekjet e tyre për riciklim, duke penguar kështu konsumatorët të merrnin në konsideratë ndikimin mjedisor kur zgjidhnin një automjet. Kjo zvogëlonte presionin mbi kompanitë për të shkuar përtej kërkesave minimale ligjore.
“Ne nuk do të tolerojmë asnjë lloj karteli, përfshirë ata që pengojnë ndërgjegjësimin e klientëve dhe kërkesën për produkte më miqësore me mjedisin,” tha Nënkryetarja e Komisionit, Teresa Ribera.
Të gjithë prodhuesit e përfshirë, zyrat e të cilëve u kontrolluan nga autoritetet në vitin 2022, pranuan fajësinë në këmbim të uljes së gjobave.
Në një hetim të ngjashëm në Mbretërinë e Bashkuar, Autoriteti i Konkurrencës dhe Tregjeve (CMA) gjobiti 10 prodhues makinash dhe dy shoqata tregtare me një total prej 77.7 milionë paundësh (93 milionë euro, 100.4 milionë dollarë).
Sipas CMA, kompanitë BMW, Ford, Jaguar/Land Rover, Peugeot/Citroen, Mitsubishi, Nissan, Renault, Toyota, Vauxhall dhe Volkswagen kishin “rënë në mënyrë të paligjshme dakord që të mos konkurronin mes tyre në reklamimin e përqindjes së riciklueshme të makinave të tyre” dhe “bashkëpunuan për të shmangur pagesën e palëve të treta për riciklimin e makinave të klientëve të tyre”.
Lucilia Falsarella Pereira, drejtoreshë e CMA për zbatimin e konkurrencës, deklaroi:
“Marrëveshjet me konkurrentët për çmimet që do të paguash për një shërbim ose bashkëpunimi për të kufizuar konkurrencën janë të paligjshme. Kjo vlen edhe për mënyrën se si i reklamoni produktet tuaja. Kjo lloj bashkëpunimi mund të kufizojë aftësinë e konsumatorëve për të bërë zgjedhje të informuara dhe të ulë nxitjen për kompanitë që të investojnë në iniciativa të reja.”
Ashtu si në BE, Mercedes-Benz përfitoi nga imuniteti pasi raportoi ekzistencën e kartelit.
