Një 39-vjeçar është arrestuar nga policia e Shkodrës, pasi është kapur i armatosur me një armë pa leje.
Gjatë kontrolleve në qytet, blutë kanë vënë në pranga Blerim Beqirin, banues në fshatin Oblikë.
Atij iu gjet me vete një pistoletë e mbushur ndërsa pas kontrollit në banesënb e tij, iu gjetën edhe 370 fishekë model 56.
“Kontrolle të befasishme në lokale, ambiente dhe në akset rrugore. Kontrollet për kapjen e personave që qarkullojnë me armë zjarri apo të ftohta si dhe për kapjen e personave në kërkim. Kontrollet nga Strukturat e Drejtorisë Vendore të Policisë Shkodër, Forca e Posaçme “Shqiponjat”, efektivat e Komisariatit të Policisë Shkodër, të mbështetura dhe nga FNSH Shkodër.
Gjatë kontrolleve Policia arreston në flagrancë një 39 vjeçar i cili mbante me vete armë zjarri pistoletë me fishek në fole. Gjatë kontrolleve në lokalet e natës nga FNSH dhe policia lokale u shoqëruan për verifikim 10 persona.
Në vijim të punës për kapjen e personave në kërkim, të atyre që qarkullojnë me armë zjarri, nga strukturat e Forcës së Posaçme “Shqiponjat” në D. V. P. Shkodër në bashkëpunim me Forcën Operacionale në D. V. P. Shkodër si dhe shërbimet e Komisariatit të Policisë Shkodër të mbështetur dhe nga FNSH Shkodër, u kap dhe u arrestua në flagrancë shtetasi:
Blerim Beqiri, 39 vjeç, banues në fshatin Oblikë, Shkodër
Arrestimi i tij u bë pasi gjatë kontrolleve te befasishme në nje lokal, këtij shtetasi policia i gjeti në trup një armë zjarri pistoletë të mbushur me fishek në fole.
Gjithashtu gjatë kontrollit në banesën e këtij shtetasi Policia gjeti dhe 370 fishekë luftarakë model 56.
Materialet iu referuan Prokurorisë së Rrethit Gjyqësor Shkodër për veprën penale “Mbajtja pa leje dhe prodhimi i armeve, armeve shperthyese dhe i municionit” parashikuar nga neni 278 i Kodit Penal.” – thuhet në njoftim.
