Një avion me 188 persona në bord është rrëzuar në det në Indonezi. Sipas “Daily Mail”, avioni ‘Lion Air Boeing’ ra në det sapo ishte ngritur nga pista e aeroportit të kryeqytetit indonezian, Xhakarta, ndërsa kishte planifikuar që të ulej në Pangkal Pinang.
Sipas “BBC” ende nuk është gjetur asnjë i mbijetuar. Avioni e humbi kontaktin me pikën e kontrollit pak minuta pas ngritjes.
Aeroplani ishte një lloj i ri i avionëve dhe nuk është e qartë se çfarë e shkaktoi rrëzimin. “Lion Air” është operatori më i madh i Indonezisë me kosto të ulët.
“Aeroplani u rrëzua në ujë rreth 30 deri në 40 metra të thella”, tha zëdhënësi i Agjencisë së Kërkimit dhe Shpëtimit Yusuf Latif për agjencinë e lajmeve “AFP”: “Ne jemi ende në kërkim të mbetjeve të avionit”.
Në ujë janë gjetur sende personale të pasagjerëve, që nga kartat e identitetit deri tek fotografitë.
“Nuk e dimë ende nëse ka ndonjë të mbijetuar”, u tha gazetarëve kreu i agjencisë, Muhmmad Syaugi: “Ne shpresojmë, ne lutemi, por ne nuk mund të konfirmojmë.”
