Personi që sot mbante megafonin gjatë protestës së banorëve të Astirit, është shoqëruar nga policia.
Disa deputetë të opozitës së bashkuar, të Partisë Demokratike si dhe Endrit Braimllari i Lëvizjes Socialiste për Integrim janë nisur për në Komisariatin 6, ku po mbahet i ndaluari.
U bënë tetë ditë që kur nisën protestat e banorëve të Astirit.
Deputetë të opozitës shkuan edhe dy ditë më parë të interesohen për banorët e ndaluar në komisariatin e Kombinatit, ku ishin 12 persona të shoqëruar, mes tyre edhe një grua shtatzënë.
Banorët e Astirit bllokuan rrugën që lidh kombinatin me “Sheshin Shqiponja”, ku nuk kanë munguar tensionet me drejtuesit e automjeteve që kërkonin të kalonin. Madje ndodhi edhe një përplasje nga e cila mbeti i lënduar një kameraman.
Banorët thonë se kanë marrë urdhër të lejohen të kalojnë vetëm ambulancat dhe se nuk do ndalen nga protestat, megjithatë u kërkojnë ndjesë personave që u bllokojnë rrugën. “Jemi të gjithë për një qëllim”, është motoja e tyre.
Që nga mëngjesi i sotëm objekti artistik “Shqiponja” nga e cila mori emrin edhe sheshi në hyrje të Tiranës nuk është më në vendin e tij, e duket se Bashkia ka nisur punën për projektin e “Unazës së Madhe”, duke injoruar protestët e banorëve të Astirit, të cilët kanë dalë çdo ditë në protesta.
Pjesa më e madhe e këtyre banorëve, nuk i kanë banesat të legalizuara edhe pse kanë aplikuar prej shumë vitesh dhe vetë kryeministri në fushatë u pati premtuar legalizim falas.
Duke mos i patur banesat të legalizuara, këta banorë rrezikojnë të mos marrin dëmshpërblim për shembjen e shtëpive që i kanë ndërtuar me paratë e shumë viteve punë.
Ata thonë se janë 600 familje që do të nxirren në rrugë, ndërsa i kërkojnë kryeministrit Rama dhe kryebashkiakut Veliaj t’u japin një zgjidhje.
