Kombëtarja shqiptare U-21 ka arritur të regjistrojë një fitore bindëse me rezultatin 2-0, në sfidën miqësore përballë Maltës, të luajtur në stadiumin “Selman Stërmasi” në kryeqytet.
Ky ishte një test mjaft i rëndësishëm për Shpresat e Shqipërisë, pasi trajneri Alban Bushi kishte rinovuar me shumë emra listën e futbollistëve të grumbulluar, duke afruar shumë prurje të reja.
Kuqezinjtë dominuan takimin që nga fillimi dhe gjetën golin e parë me anë të sulmuesit shkodran të Partizanit, Rubin Hebaj, i cili devijoi drejt portës një top dhe pa që të ndalej në rrjetë.
Vetëm pak minuta më vonë, ishte sërish Hebaj që u ndal me faull në zonë, ndërsa penalltinë e ekzekutoi saktë futbollisti i Shkëndijës së Tetovës, Omar Ymeri, i cili e dërgoi topin për herë të dytë në rrjetë.
Ishin pikërisht Ymeri dhe sulmuesi anësor Kolaj, i cili aktivizohet me të rinjtë e Sassuolos, ata që spikatën më shumë në këtë takim dhe dhanë sinjale se e ardhmja e Shqipërisë pritet të jetë e mirë.
