Pas protestës masive të studentëve të tre fakulteteve, atyre të Shkencave të Natyrës dhe ata të Inxhinierisë së Ndërtimit dhe të Arkitekturës dhe Urbanistikës, ministrja e Arsimit Lindita Nikolla ka kërkuar që një përfaqësi e studentëve të ulet në negociata.
Në një lidhje telefonike për televizionin “Ora News”, Nikolla është shprehur: “Unë, zv.ministrja dhe këshilltari kemi kërkuar që një përfaqësi e tyre të vijnë dhe të diskutojnë. Për mua nuk ka rëndësi nga inkurajohen dhe nga e marrin nxitjen. Unë jam e vendosur për të komunikuar dhe të sqaroj”.
Mirëpo në një lidhje të drejtë për “Fax News”, gazetarja i pyeti studentët në protestë nëse është e vërtetë që një grup përfaqësues i tyre po negocion me Nikollën dhe përgjigja ishte mohuese.
“Nuk pranojmë grupe përfaqësimi”, tha studenti.
Studentët kanë rrethuar ministrinë e Arsimit dhe nuk pranojnë negociata, ndërsa i kanë dhënë ultimatum qeverisë t’u përgjigjet kërkesave të tyre brenda ditës dhe brenda orarit zyrtar të punës.
Studentët kanë tre kërkesa:
1.Heqjen e pagesës për kredite të provimeve të mbartura.
2. Shtyrjen e afatit të pagesës së tarifës vjetore.
3. Pagesën me këste të tarifës.
“O Linditë që s’di këndim, u bëre ministre për arsim”, është një nga shumë parrullat që shoqërojnë këtë protestë.
