Protesta studentore e nisur fillimisht nga studentët e Fakultetit të Arkitekturës dhe Urbanistikës, ka marrë përmasa të tjera.
Jo vetëm studentët e Universitetit të Tiranës e të Kamzës, por edhe ata të Durrësit, Elbasanit dhe Korçës, janë ngritur në protesta të cilat po zhvillohen paralelisht me ato në Tiranë.
Mijëra studentë janë mbledhur në protestë para Ministrisë së Arsimit, kundër tarifave të vendosura nga qeveria e drejtuar nga Edi Rama.
Prej disa ditësh, studentët kërkojnë heqjen e tarifës për çdo provim dhe kërkesa të tjera. Sot ata kanë bllokuar akset kryesore në kryeqytet.
“Lindita Nikolla dil në Bulevard, arsimi është i yni, nuk është biznes privat”, është një nga thirrjet e studentëve.
Kërkesat e studentëve janë tre:
- Heqja e pagesës për kredite të provimeve të mbartura.
- Shtyrja e afatit të pagesës së tarifës vjetore.
- Pagesa me këste të tarifës.
