Përmes një raporti të posaçëm të përpiluar nga Komiteti kundër pastrimit të parave, “Moneyval”, KiE e ka vendosur Shqipërinë në listën e vendeve me mbikëqyrje të thelluar për pastrim parash.
“Korrupsioni përbën një risk të madh për pastrim parash në Shqipëri, që shpesh është i lidhur me krimin e organizuar. Autoritetet shqiptare janë të vetëdijshme për këtë risk, por deri tani, zbatimi i ligjit i ka dhënë vëmendje të kufizuar targetimit të parave që vijnë nga korrupsioni”.
Autoriteti që koordinon luftën kundër pastrimit të parave në Shqipëri është Drejtoria e Përgjithshme për Parandalimin e Pastrimit të Parave.
Sipas “Moneyval”, kjo drejtori përdor një sërë burimesh informacioni, mbi bazën e të cilave kryhen shumë hetime për pastrim parash. Por, këto hetime prodhojnë pak rezultate konkrete edhe për shkak të punës së dobët nga organet e drejtësisë.
“Hetimet, rrallë rezultojnë në ndjekje penale ose konfiskim të aseteve të krimit, e shpeshherë pezullohen nga Prokuroria”.
Sipas të dhënave zyrtare, në 5 vitet e fundit asetet e konfiskuara nga aktivitetet kriminale kanë shënuar rritje të ndjeshme. Por, sipas raportit të “Moneyval”, sërish asetet e konfiskuara nga qeveria nuk janë në përpjestim me nivelin e kriminalitetit në vend.
Ndaj, Këshilli i Europës i ka bërë thirrje qeverisë që të forcojë luftën kundër pastrimit të parave dhe financiamit të terrorizmit.
