Pasi u largua nga familja e saj dhe “shpëtoi” nga dëbimi pas reagimit në rrjetet sociale, një vajzë e re nga Arabia Saudite është shumë pranë marrjes së azilit në Australi, ndërsa zyrtarët lokalë kanë thënë se ajo nuk do të marrë “trajtim të posaçëm”.
Komisioneri i Lartë i OKB-së për Refugjatët i dha statusin e refugjates, 18-vjeçares Rahaf Mohammed al-Qunun.
Qeveria australiane tha se do të vlerësojë rastin e al-Qunun sipas procedurave të saj standarde, ashtu siç bën me referime të tjera të OKB-së por nuk pranoi të komentonte më tej.
Ministri për Çështjet e Brendshme, Peter Dutton, u tha gazetarëve se gruaja saudite nuk do të marrë ndonjë “trajtim të posaçëm” lidhur me procesin e azilit.
Media australiane njoftoi më herët se zyrtarët janë të gatshëm të lëshojnë një vizë humanitare për Rahaf nëse OKB vlerëson se e reja ka nevojë për mbrojtje ndërkombëtare.
Politikanët lokalë dhe aktivistët i kanë bërë thirrje kryeministrit që ta lejojë vajzën nga Arabia Sauditetë futet në vend sa më shpejt që të jetë e mundur.
Rahaf, një shtetase saudite, u largua nga familja e saj javën e kaluar. Ajo hipi në një aeroplan në Kuvajt, duke shpresuar të kërkonte azil në Australi, por u kap në një zonë tranziti në aeroportin e Bangkokut, Tajlandë.
Ajo pohoi se një diplomat saudit ia mori pasaportën e saj me planin për ta dërguar me forcë në shtëpinë e saj. Ajo më pas u vetëkyç brenda brenda dhomës së hotelit të aeroportit, duke refuzuar të largohej derisa zyrtarët e OKB-së ndërhynë.
