Kolumbia po mban zi për vrasjen e 21 policëve në një nga sulmet terroriste më vdekjeprurëse të viteve të fundit.
Më shumë se 60 persona të tjerë u plagosën gjithashtu të enjten në sulmin ndaj Akademisë së Policisë “General Santander” në kryeqytetin Bogota, përpara një ceremonie diplomimi.
Prokurorët e identifikuan sulmuesin si Jose Aldemar Rojas Rodriguez, por asnjë grup nuk mori përgjegjësinë.
Terroristi e ngarkoi makinën e tij plot me eksploziv dhe më pas e shpërtheu atë pranë turmës. Ivan Duque, presidenti i Kolumbisë, e quajti atë një “akt të çmendur terrorist” dhe deklaroi tri ditë zie kombëtare.
“Të gjithë kolumbianët e refuzojnë terrorizmin dhe ne qëndrojmë të bashkuar kundër tij.” – shkroi ai në rrjetet sociale.
Disa media lokale spekuluan se shpërthimi mund të ketë lidhje me anëtarët e FARC-ut, pavarësisht marrëveshjes së paqes së nënshkruar mes kësaj organizate dhe qeverisë kolumbiane në vitin 2016 por deri tani nuk ka ende provë për këtë.
