Të tjera detaje zbulohen lidhur me vrasjen që ndodhi mbrëmjen e kaluar në një lokal në Korçë. Autori i dyshuar është identifikuar si Oligert Mustafaj, i cili rezulton me precedent të mëparshëm penal.
Mustafaj banonte afër vendit ku ndodhi ngjarja, ndërsa grupi hetimor beson se shkak për vrasjen e Altin Balliut është bërë një sherr mes dy grupesh.
35-vjeçari që u ekzekutua mbrëmë në qytetin e Korçës, Altin Balliu nga fshati Slabinjë i Pogradecit, ndodhej në një lokal me miq të tij, por pas një sherri ai u qëllua me armë zjarri në kokë.
Ngjarja ka ndodhur rreth orës 21:25 në Lagjen Nr.10 të Korçës. Policia beson se pak kohë pas një sherri në lokal, personi tjetër i përfshirë në konflikt është hakmarrë duke e qëlluar për vdekje nga një distancë e afërt.
“Rreth orës 21:25, në Lagjen Nr. 10 në Korçë është vrarë, dyshohet me armë zjarri, një shtetas rreth 30 vjeç, ende i paidentifikuar. Dyshohet se ngjarja ka ndodhur pas një konflikti që viktima ka pasur me autorin e ngjarjes. Grupi hetimor po punon për zbardhjen e rrethanave të ngjarjes, identifikimin dhe kapjen e autorit”, bëhet e ditur nga Policia.
Kanë qenë kalimtarët e rastit ata që kanë lajmëruar Policinë, pasi kanë parë në trotuar një trup të pajetë. Pranë trupit të viktimës ndodhej një automjet me targa AA947VA, që është qëlluar me plumb në kofano.
Sipas grupit hetimor autori ka qëlluar fillimisht me një plumb makinën e viktimës. 30-vjeçari ka dalë nga makina, autori e ka ndjekur dhe e ka qëlluar me plumb në kokë duke e lënë të vdekur.
