Studentët e Universitetit të Durrësit, ashtu sikurse paralajmëruan mbrëmjen e kaluar, sot kanë vijuar me protestën.
Studentët kanë bojkotuar mësimin dhe janë ngujuar në universitet, për të kërkuar anullimin e Ligjit për Arsimin e Lartë.
Studentët janë organizuar me flamujt kuq e zi ndërsa ka patur edhe tymuese në oborrin e universitetit.
“Ditën e hënë datë 28 Janar 2019, Studentët e Universitetit Aleksandër Moisiu Durrës, do të protestojnë për të disatën herë për një sistem Arsimor Cilësor.
Kërkesat tona tanimë janë të qarta si drita e diellit për të gjithë ata që duan dhe kanë vullnetin për t’i lexuar drejtë ato.
Protesta do të nisë në orën 08:30 para Kampusit 1 dhe 2 në Spitallë e më pas studentët do të marshojnë në formë simbolike drejtqytetit te të Durrësit.
Të gjithë së bashku, duam të kontribuojmë në ndërtimin e një arsimi cilësorë, si shtylla kryesore e një kombi, që e mban atë gjallë .”, paralajmëruan dje studentët në Durrës.
Ata u kanë bërë thirrje edhe pedagogëve t’u bashkohen, duke u bërë apelin se “Një orë leksioni, nuk është më e rëndësishme sesa mijëra orë në ditët dhe vitet në vijim.”.
