Policia është tërhequr pas incidentit me protestuesit para godinës së Kryeministrisë. Protestuesit e kanë përshëndetur vendimin e policëve me duartrokitje.
Gjatë protestës së sotme, protestuesit kanë arritur të thyejnë kordonin e policisë dhe të grisin tendën e vendosur para Kryeministrisë. Policia përdori gazlotsjellës kundër tyre dhe gjashtë prej protestuesve u shtrinë në tokë të lënduar, në gjendje të fikëti.
Dy ambulanca mbërritën në vendngjarje dhe protesuesit u hapën atyre rrugën në mënyrë që mjekët të mbërrinin sa më shpejt për t’u ardhur në ndihmë të lënduarve.
Kreu i opozitës Lulzim Basha, ka deklaruar se policia ka patur plan të shkaktojë dhunë në protestë që në fillim dhe ka provokuar qëllimisht protestuesit.
“Hapja e kordonit policor, plan i Rames per te nxitur dhunen Ministri i Brendshëm e di fare mirë që kordoni i policisë ka hapur radhët për të krijuar një skenë të tillë. Siç e shikoni rrinë duarkryq sepse kanë një skenar për të nxitur dhe për të stimuluar dhunë. Ka nisur para katër ditësh me deklarata të papërgjegjshme të Policisë, ka vazhduar gjithë mbrëmjen e djeshme, ditën e sotme, gjatë kohës që kanë qarkulluar protestuesit. Dhe tani ndërkohë që protesta filloi plotësisht në mënyrë paqësore dhe s’kam asgjë me efektivët, se efektivët kanë marrë lule nga ne në fillim të protestës. Ndërkohë me presionin më të vogël të turmës, që natyrisht që janë të irrituar sepse janë banorë të Unazës së Re, kanë shkuar për t’u prishur shtëpitë për t’u vjedhur 18 milionë euro, papritur shohim që hapet kordoni policor. Kjo do të thotë që ka një plan për të nxitur dhunë. Ka një plan për të nxitur dhunën që t’i drejtojë gishtin e akuzës opozitës dhe kjo është e papranueshme.”, tha Basha./Hashtag.al
