Presidenti i përkohshëm i vetëshpallur i Venezuelës, Juan Guaido, ka bërë thirrje për protesta masive.
“Unë i bëj thirrje venezuelianëve të mblidhen në të gjithë vendin nesër në orën 11,” shkroi Guaido në Twitter këtë të dielë, pasi njoftoi kthimin e tij në vend.
Guaidó, i cili është njohur nga mbi 50 vende si president i përkohshëm, i ka bërë thirrje Presidentit Nicolás Maduro të japë dorëheqjen.
Por Maduro këmbëngul se ai është presidenti legjitim dhe mbështetet nga Kina, Rusia dhe Kuba.
“BBC” shkruan se tani është e paqartë se si Guaido do të kthehet në Venezuelë, dhe çfarë veprimi do të marrë Maduro nëse ai kthehet.
Gjykata e Lartë vendosi një ndalim udhëtimi për Guaido-n pasi ai shpalli presidencën e përkohshme.
Por Guaido e ka thyer këtë vendim, duke kaluar kufirin në Kolumbi. Muajin e kaluar Guaido ka vizituar disa vende të Amerikës Latine, duke takuar zëvendëspresidentin amerikan Mike Pence në Kolumbi dhe presidentin e ri të Brazilit, Jair Bolsonaro.
Këshilltari i Sigurisë Kombëtare i SHBA John Bolton ka deklaruar: “Çdo kërcënim ose veprim kundër kthimit të tij të sigurt, do të marrë një përgjigje të fortë dhe të rëndësishme”.
