Presidenti Ilir Meta, ditën e sotme e ka nisur me një thirrje të fortë për institucionet dhe shoqërinë, në kuadër të Ditës Botërore të Sindromës Down.
Meta ka publikuar disa foto nga takimi me fëmijët që vuajnë nga sindroma Down, ku është shoqëruar nga vajza e tij e vogël, ndërsa kërkon solidaritet, dashuri dhe ndihmë në përkrahjen e këtyre fëmijëve.
“Emocione të forta ndjej gjithmonë nga dashuria e pastër që dinë të falin fëmijët e mrekullueshëm të prekur nga sindroma down. Përherë mbresëlënëse do të mbeten edhe takimet me ta, kur më kanë njohur me pasionet por edhe me talentet e jashtëzakonshme të tyre. Ndenja që jam i bindur, se i kemi përjetuar të gjithë.
Ndaj sot, në Ditën Botërore të Sindromës Doën, një thirrje të fortë u bëj të gjithë institucioneve dhe shoqërisë, për solidaritet, dashuri dhe ndihmë të pakufijshme në përkrahje të tyre, për t’i ndihmuar fuqimisht për të zhvilluar potencialet drejt një jete të pavarur e të mirëintegruar. Mirënjohje e falënderim të veçantë kam sot edhe për prindërit, por edhe edukatorët e aktivistët që kujdesen me përkushtimin ndaj këtyre fëmijëve, për këtë mision që fisnikëron jo vetëm ata, por të gjithë shoqërinë”, shkruan Meta.
