Një sasi lënde narkotike është sekuestruar nga poolicia ku kanë rënë në pranga edhe 5 persona.
Policia e shtetit në kuadër të operacionit “Stafeta” kapi në flagrancë 5 shtetas të cilët në bashkëpunim me njëri-tjetrin tregtonin lëndë narkotike te tipit kokainë.
Policia arriti të kapte rreth 300 gramë kokainë e cila vinte nga qyteti i Laçit dhe tregtohej në kryeqytet.
Njoftimi i policisë:
Seksioni për Hetimin e Narkotikëve në kuadër të operacionit policor të koduar “STAFETA”, arrestoi në flagrancë shtetasit:
– Gj. D., 36 vjeç, banues në Laç;
– M. P., 44 vjeç, banues në Mamurras;
– A. L., 25 vjeç, banues në Fushë Kuqe/Patok;
– A. N.,23 vjeç, banues në Fushë Kuqe/Patok;
– E. D., 28 vjeçe, banuese në Laç.
Seksioni për Hetimin e Narkotikëve në bazë të informacioneve të siguruara në rrugë operative nga burime të ndryshme, dyshonte se shtetasi Gj. D., me banim në Laç, në bashkëpunim me shtetasit M. P., A. L., A. N., dhe E. D., tregtonin dhe shisnin në kryeqytet me porosi klientele, lëndë narkotike të llojit kokainë të cilin e sillnin nga qyteti i Laçit.
Këta shtetas janë konstatuar nga shërbimet e policisë duke qarkulluar me dy automjete në rrugën e “Valiasit” në Kamëz dhe janë ndaluar për kontroll. Gjatë kontrollit të ushtruar, policia gjeti në njërin mjet një qese me lëndë të dyshuar narkotike e llojit kokainë.
Janë sekuestruar në cilësinë e provës materiale 249.2 gramë lëndë e dyshuar narkotike e llojit kokainë; dy automjete dhe gjashtë aparate celular.
Materialet proceduriale i kaluan Prokurorisë pranë Gjykatës së Shkallës së Parë Tiranë, për veprën penale te “Prodhimit dhe shitjes së lëndëve narkotike në bashkëpunim” parashikuar nga neni 283/2 i Kodit Penal në ngarkim të shtetasve të lartpërmendur.
