Kreu i Partisë Demokratike, Basha, ka dënuar me forcë dhunën e ushtruar ndaj banorëve të Bregut të Lumit, në aksionin e policisë së rendit dhe asaj bashkiake për prishjen e banesave.
Në një deklaratë për media, kryedemokrati tha se dhunuesit e grave që u dëbuan sot nga banesat janë fytyra e vërtetë e Edi Ramës.
Basha tha se shefi i Komisariatit numër 4, Agim Hoxha, i cili u shfaq sot në media duke dhunuar një grua, është i njohur bandit me uniformë pasi ka dhunuar më parë qytetarët në protestat e opozitës.
Deklarata e Bashës
Dhunuesit që shqiptarët panë sot duke rrahur një grua të dëbuar me forcë nga shtëpia e saj, dhe duke goditur përfaqësuesit e opozitës në mbështetje të banorëve te dëbuar, janë fytyra e vërtetë e Edi Ramës.
Dhunuesi i zonjës tek Bregu i Lumit është shefi i Komisariatit 4, Agim Hoxha, një bandit me uniformë, që ka dhunuar më parë edhe qytetarët dhe përfaqësueset gra të opozitës.
Dhunuesi tjetër është fytyra e Erion Velisë në Policinë Bashkiake, që ka rrahur dhe dhunuar më parë edhe gjyshet që shesin prodhimet e bahçes për të mbajtur frymën gjallë si dhe shumë qytetarë të pambrojtur.
Edi Rama nuk mund ta mbajë më pushtetin e tij të paligjshëm veçse duke përdorur dhunën: dhunë kundër qytetarëve, dhunë kundër gazetarëve, dhunë kundër kundërshtarëve politikë, dhunë kundër Kushtetutës. Dhunë ndaj kujtdo që i tregon ligjin Edi Ramës, qoftë ky artist që mbron teatrin, qytetar që mbron shtëpinë apo opozitar që mbron të drejtat e qytetarëve.
Thirrja ime për çdo shqiptar është të qëndrojmë në këmbë!
Të qëndrojmë të bashkuar dhe të vendosur për t’i dhënë fund dhunimit të Shqipërisë nga një grup banditësh me pushtet të vjedhur e të blerë me krimin.
Së bashku do të bëjmë të mundur që dhunuesit e shqiptarëve, nga Edi Rama deri tek banditët me uniformë, të japin llogari para ligjit për çdo padrejtësi!
