3 persona, njëri prej të cilëve akuzohet si personi që ka qëlluar me armë, janë shpallur në kërkim nga policia lidhur me plagosjen e një 28-vjeçari ditën e djeshme në Mëzez të Tiranës.
26-vjeçari me iniciale M.G., dyshohet si personi që ka qëlluar ndaj të riut, kurse 2 persona të tjerë akuzohen si bashkëpunëtorë në plagosje.
Njoftimi i policisë
Zbardhet ngjarja e ndodhur mbasditen e djeshme ku në Fushë Mëzez në Kashar u plagos me armë zjarri shtetasi E. M., 28 vjeç.
Policia shpall në kërkim një shtetas për veprën penale “Vrasje me dashje e mbetur në tentativë”.
Shpallen në kërkim dhe dy të tjerë për “Përkrahje e autorit në krim”.
Shërbimet e policisë të komisariatit nr.6 pas një pune intensive hetimore shpallën në kërkim shtetasin:
M. G., 26 vjeç, banues në Tiranë.
Mbasditen e djeshme në Fushë Mëzez, Kashar ka qëlluar me armë zjarri në drejtim të shtetasit E. M., i cili mbeti i plagosur dhe ndodhet në spital jashtë rrezikut për jetën.
Nga veprimet hetimore të kryera rezulton se në mjetin që drejtonte autori i dyshuar shtetasi M. G., ndodheshin dhe shtetasit A. M., 29 vjeç dhe F. Gj., 35 vjeç, të cilët janë shpallur në kërkim për veprën penale “Përkrahje e autorit në krim”.
Materialet iu referuan për veprime të mëtejshme Prokurorisë së Rrethit Gjyqësor Tiranë.
