Të dhënat e publikuara sot nga Eurostat bëjnë se në vitin 2018, numri i aplikimeve të minorenëve të pashoqëruar nga Shqipëria për azil në një nga vendet e Bashkimit Europian ishte 475, duke përbërë rreth 2.5% të totalit të aplikimeve nga e gjithë bota.
Në krahasim me një vit më parë, numri i aplikimeve ka rënë me 10%, por pesha ndaj totalit ishte më e ulët në 2017-n (1.6%), për shkak se në vitin 2018 kanë rënë aplikimet në përgjithësi. Pjesa më e madhe e aplikimeve të të miturve shqiptarë janë bërë në Mbretërinë e Bashkuar (285), në Gjermani (40), në Suedi (35), Holanda (30), Belgjikë (25) Francë dhe Itali nga 15.
Në vlerë absolute, Shqipëria ka numrin më të lartë të aplikimeve të minorenëve në Ballkan. Vetëm në 2018-n, në total numri i aplikimeve nga vendet e tjera të Ballkanit ishte 50, nga të cilët 20 nga Kosova, 15 nga Serbia, 10 nga Maqedonia e veriut dhe 5 nga Bosnjë Hercegovina.
Në raport me popullsinë totale, sipas të dhënave të përpunuara nga Monitor, Shqipëria renditet e dyta në botë, pas Eritresë, me 17 aplikime për 100 mijë banorë. Eritrea ka nivelin më të lartë të aplikimeve të minorënëve në botë me 43 për 100 mijë banorë.
Pas Shqipërisë renditet Guinea me 9.8 aplikime për 100 mijë banorë, Afganistani me 9, Siria me 7.4 dhe Iraku me 2.9.
Në total, po sipas Eurostat, gjatë 5 viteve të fundit kanë aplikuar për azil në vendet e BE-së, 3630 minorenë të pashoqëruar nga Shqipëria. Numri më i lartë i tyre ishte në 2015-n, me 1065 minorenë.
Aplikimet në total
Sipas raportit të publikuar sot nga Eurostat, pothuajse 20,000 të mitur të pashoqëruar ishin në mesin e azilkërkuesve të regjistruar në BE në vitin 2018. Një e katërta janë afganët ose Eritreasit.
Në vitin 2018, 19 700 azilkërkues u konsideruan të jenë të mitur të pashoqëruar. Numri i tyre është ulur me më shumë se një të tretën krahasuar me vitin 2017 (31 400) dhe nën nivelin e vitit 2014 (23 100). Në 2018, në nivel të BE-së, të miturit e pashoqëruar përbënin 10% të të gjithë aplikantëve të moshës nën 18 vjeç.
Në vitin 2018, shumica e të miturve të pashoqëruar ishin meshkuj (86%). Tre të katërtat ishin të moshës 16 deri 17 vjeç (14 800 persona), ndërsa ata të moshës 14-15 vjeç përbënin 17% (3 400 persona) dhe ata me moshë më të vogël se 14 për 7% (1 400 persona). Më shumë se gjysma e aplikantëve për azil që konsiderohet të jenë minorenë të pashoqëruar ishin qytetarë të gjashtë vendeve: Afganistani (16%), Eritrea (10%), Pakistani ose Siri (të dyja 7%) dhe Guinea ose Irak (të dyja 6% ).
VINI RE: Ky material është pronësi intelektuale e Monitor
