Kryeministri Edi Rama ka reaguar lidhur me lajmet që kanë qarkulluar pas Samitit në Berlin. Rama tha se nuk kishte shkuar në Gjermani për të diskutuar për hapjen e negociatave për integrimin e Shqipërisë në BE. Sipas tij politika dhe mediat në vend kanë dezinformuar publikun lidhur me Samitin.
“Nuk kisha parë kurrë dezinformim më të madh politik dhe mediatik sesa terësia e marrëzive dhe ligësive. Samiti nuk kishte asnjë lidhje me negociatat për anëtarësim të Shqipërisë dhe Maqedonisë së Veriut në BE.
Deklarata e Samitit nuk kishte asnjë fjalë për zgjerimin.
Kancelarja Merkel kishte dy takime bilaterale me mua dhe Zaev për çeljen e negociatave, por si edhe në herët e tjera, unë nuk shkova për të marrë një përgjigje nga kancelarja gjermane. Sepse dihet botërisht që vendimmarrja e Gjermanisë kalon përmes Bundestagut dhe kancelarja gjermane nuk e thotë kurrë fjalën e fundit pa u marrë vendimi.
Gramafonët dhe filxhanët e Tiranës që lajmëruan kobin e mbylljes së derës së negociatave për Shqipërinë, pa përfunduar ende takimi, ishin thjesht dhe vetëm një shprehje ekstreme e dëshpërimit që duan të marrin Shqipërinë në rrugën e theqafjes që kanë zgjedhur vetë.
Ata që thonë se negociatat nuk hapen sa të jem unë, sa të jemi ne në qeveri, është e vajtushme, e shëmtuar, e turpshme, sepse s’ka besoj shqiptar të llogjikshëm që nuk e kupton, se kjo nuk lidhet vetëm me sa bëjmë dhe çfarë bëjmë ne, por për fat të keq me atë çfarë ndodh me politikën e Brendshme të BE. Çfarë duhet të bëjë më shumë përshembull Kosovës për liberalizimin e vizave.”, tha Rama.
