Trajneri Jurgen Klopp nuk e fshehu dot entuziazmin, pasi Liverpool mposhti Barcelonën me rezultatin 4:0. Pas ndeshjes, Klopp ndërsa fliste për “BT Sport” përdori edhe fjalë që nuk lejohen të përdoren në televizion. “Më gjobisni nëse doni” tha ai, por nuk i mbante dot ato fjalë brenda. Ai u shpreh me superlativa dhe për Shaqirin dhe Origin.
“Kjo ishte e tepërt! Ishte e papërballueshme emocionalisht. Luajtëm ndaj ekipit më të mirë në botë. Të fitosh është e vështirë, por të fitosh pa pësuar gol, kjo është e pabesueshme!
Kam parë James Milner duke qarë në fushë pas ndeshjes. Kjo është një fitore shumë e rëndësishme për ne. Ka gjëra më të rëndësishme në këtë botë, por të krijosh këtë atmosferë kaq emocionuese është shumë e veçantë. Merita është e gjitha e lojtarëve.
Këta kanë potencial dhe zemër, por mbi të gjitha vetëbesim. Origi dhe Shaqiri nuk kanë luajtur shumë dhe të luash në atë mënyrë, kjo tregon se në futboll nuk ka asgjë të pamundur.
Duhet të ishim seriozë, por edhe dinakë. Ishte e nevojshme. Barcelona mbrohet mirë, prandaj duhet të ishim të paparashikueshëm. Goditjen e këndit te goli i katërt nuk e pashë fare, ndërsa asistenti im më pyeti se çfarë kishte ndodhur.
Ora është 11:30, fëmijët kanë fjetur. Më gjobisni nëse doni, por këta djem ishin “fuc**g unbelievable” (të pabesueshëm)”, janë fjalët e Klopp.
