Majtas Kurz, djathtas Strache
Kancelari austriak, Sebastian Kurz, i partisë konservatore, “ÖVP”, sipas informacioneve të agjencisë së lajmeve “dpa”, e përjashton mundësinë e mëtejshme të bashkëpunimit me zëvendëskancalerin austriak dhe kreun e partisë së lirë, “FPÖ”, Heinz-Christian Strache.
Austria është tronditur nga skandali i një videoje. Në një filmim të fshehtë nga viti 2017 Heinz-Christian Strache me gjasë i premton një oligarkeje ruse mbështetje zgjedhore për tendera publikë, në rast se “FPÖ” do të ishte pjesë e qeverisë. Videoja e shpërndarë nga “Spiegel” dhe “Süddeutsche Zeitung” bën fjalë edhe për një ide të oligarkes, për të blerë gazetën austriake me tirazhin më të lartë “Kronen Zeitung”, që të mbështesë “FPÖ” para zgjedhjeve. Prokuroria ka filluar hetimet. Në zgjedhjet e fundit “FPÖ” arriti 26% të votave.
Pyetja që shtrohet është nëse kancelari Kurz do të vazhdojë koalicionin me “FPÖ” apo do të kërkojë zgjedhje të reja. Si pasues i mundshëm konsiderohet kandidati i dikurshëm për president nga “FPÖ”, Norbert Hofer.
VINI RE: Shkrimi është pronësi intelektuale e “DW”.
