Të tjera detaje zbulohen nga arratisja e një shqiptari dhe siriani nga burgu Aulona në Greqi. Sikurse shkruan gazeta “Prothothema”, shqiptari 23-vjeçar Albion Shezairi përpara se të arratisej nga burgu kishte shkruar në një zarf “Është e rrezikshme të ikësh”.
Shezairi u arratis të hënën në mbrëmje së bashku me sirianin 21-vjeçar, por u kap një ditë më vonë në një rrugë kryesore të Athinës.
Gazeta greke zbulon detajet se si dy të dënuarit arritën të arratiseshin nga burgu. Të burgosurit në Avlona tregojnë se ata të dy njiheshin dhe siriani punonte si kuzhinier në burg.
Ata kishin bashkëpunuar ngushtë duke thurur planin për t’u arratisur që andej. Siriani që punonte në kuzhinë, kishte përfituar nga pozicioni për të vënë re ku mund të kishte hapësira boshe për t’u arratisur.
Dy të rinjtë u takuan të hënën në mbrëmje, arritën të thyejnë një derë dhe dolën në oborrin, e mbushur me mbeturina e sende të tjera. Ata prenë një tel në atë që quhet si “zonë e vdekur” e burgut.
Pasi arritën te “gardhi rrethues” ata gjetën një hapësire ku nuk kishte rrjeti teli,hipën sipër dhe dolën prej andej.
Albion Shezairi dhe siriani, sipas gazetës “Prothothema”me siguri janë ndihmuar nga fakti se siguria nuk ishte maksimale në burg.
Shqiptari 23-vjeçar ishte dënuar për shitje e prodhim lëndësh narkotike, pjesëmarrje në organizatë kriminale. Ai madje dyshohej për vrasjen e një 35 vjeçari grek në burgun e Koridhalos, ndërsa është dënuar edhe në Shqipëri për vrasjen e Aleksandër Bardhit.
