Këshilli i Lartë i Prokurorisë ka nisur sot intervistat me 22 kandidatët që kanë aplikuar për të qenë anëtarë të Prokurorisë së Posaçme Anti-Korrupsion, SPAK.
Altin Dumani është prokurori i parë që është marrë në pyetje ndërsa vlen të theksohet se ai nuk i është nënshtruar ende vettingut.
Nga 4 kandidatët që do merren në pyetje sot vetëm Arben Kraja e ka kaluar vettingun kurse Anton Martini dhe Anita Jella nuk kanë kaluar ende para Komisionit të Pavarur të Kualifikimit.
Kreu i KLP-së, Ibrahimi, tha se seancat e marrjes në pyetje po zhvillohen me dyer të mbyllura ndërsa pohoi se kandidatët e përzgjedhur nga institucioni që drejton rrezikojnë të ngecen në vetting por shtoi se KLP-ja nuk merret me integritetin, por profesionalizmin e kandidatëve.
‘Rreziku ekziston, aftësia profesionale dhe integriteti shkojnë pranë-pranë. Ky proces synon profesionalizmin, ndërsa Vettingu integritetin. Kam besimin që të dy proceset do shpien drejt rezultateve të njëjta.’ – tha Ibrahimi.
