“Edi Rama përmes Vangjush Dakos dhe krimit të organizuar kontrollon pushtetin lokal dhe drejtësinë në Durrës”, shkruan këtë të shtunë kreu i Partisë Demokratike Lulzim Basha.
Sipas tij bashkëpunëtori i bandës së Avdulajve duhet të ishte në burg, por ai është padroni i atyre që duhet ta dërgonin në burg.
“Edi Rama përmes Vangjush Dakos dhe krimit të organizuar kontrollon pushtetin lokal, drejtësinë dhe çdo institucion tjetër të Durrësit. Bashkëpunëtori i bandës kriminale të Avdylajve, liruesi nga burgu i Lul Berishës dhe pastruesi i parave të krimit në Durrës, duhet të ishte në burg, por ai është padroni i atyre që duhet ta dërgonin në burg.
Drejtësia në të gjithë Shqipërinë është sot në duart e krimit dhe të organizatës kriminale të rilindjes. Sot mes rilindasve dhe krimit nuk ka më asnjë ndryshim. Jemi kthyer në kohët e errëta, kur drejtësia ishte partia kriminale.
Me këtë drejtësi nuk do ketë kurrë politikanë në pranga, nuk do ketë kurrë kriminelë në burg. Me këtë drejtësi, prangat janë për njerëzit e thjeshtë dhe krimi e hajdutëria qeveritare bëjnë kërdinë. Çlirimi i vendit nga sundimi i Edi Ramës dhe bandës së tij në qeveri është domosdoshmëri për demokracinë, shtetin e së drejtës dhe stabilitetin e vendit.”, thotë Basha.
Ditën e djeshme me një manovër skandaloze Gjykata e Durrësit i dha mandatin kandidates socialiste për Bashkinë e Durrësit, Valbona Sakos, ndërsa vetëm një ditë më parë një gjykatës i po së njëjtës gjykatë ia kishte refuzuar.
