Vendosni fjalën kyçe....

Lleshaj kërcënon PD-në: Do t’ju çoj në gjykatë


Ministria e Brendshme përgënjeshtroi sot akuzat e PArtisë Demokratike lidhur me tenderin për uniformat e reja të Policisë së Shtetit të cilin selia blu e quajti ‘aferë korruptive’.

Por ministri i Brendshëm Sandër Lleshaj nuk është mjaftuar me kaq, ai ka reaguar edhe personalisht përmes rrjetit social në “Facebook”, ku paralajmëron se do ta çojë në Gjykatë PD-në për këtë çështje.

Lleshaj thotë se shumën financiare që do të përfitojë pas procesit gjyqësor, do t’ja dhurojë familjeve të policëve të rënë në detyrë.

“Drejtuesit e PD-së vuajnë një krizë të thellë. Ata besojnë sinqerisht se kushdo që ka një pushtet vjedh, pasi ata vetë kanë vjedhur sa herë kanë patur një mundësi për ta bërë këtë. Në vijim të kësaj logjike mjerane, përmes një deklarate dje, ata kanë parashikuar një vjedhje që do të ndodhë në të ardhmen, kur të përzgjidhet fituesi i një procedure prokurimi për uniformat e Policisë së Shtetit.

Duke hedhur poshtë me neveri gënjeshtrat e turpshme që mbajnë logon e PD-së, më mbetet t’ju them autorëve të tyre:

1) Sandër Lleshaj nuk i përket farës tuaj.

2) Sandër Lleshaj ka dhe do të ketë vetëm një pasuri në jetën e tij: Nderin e tij, të familjes, të të parëve të tij dhe të Atdheut të tij.

3) Sado të ëndërroni, Sandër Lleshajn nuk do ta keni kurrë të ngjashëm me ju, as në vjedhje, as në vrasje dhe as në turpe të tjera.

Mund të duket naivitet nxitimi juaj për të parashikuar një vjedhje në të ardhmen. Por, në të vërtetë, kjo është një përpjekje djallëzore për të ndërhyrë dhe ndikuar në një procedure publike dhe të hapur ndërkombëtare.

Dhe, pa dashur të parashikoj të ardhmen, më duhet të garantoj drejtuesit e PD, se:

1) Vjedhja e dëshiruar dëshpërimisht prej jush nuk do të ndodhë.

2) Tentativa juaj për të ndërhyrë në procesin e prokurimit të uniformave të Policisë së Shtetit nuk do të ketë sukses.

3) PD do të duhet të mbrojë përpara një gjykate poshtërsitë me të cilat ka ndotur opinionin publik.

4) Çdo shumë financiare, që do të rezultojë si zhdëmtim pas procesit gjyqësor, do të shkojë në favor të familjeve të policëve të rënë në detyrë. Përsundon Ministri Lleshaj postimin e tij.” shkruan Lleshaj.

Një ditë më parë, PD tha se “mënyra e gjetur për të vjedhur është paracaktimi i fituesit përmes shkeljes së procedurave ligjore për rregulla të barabarta loje dhe konkurencë të drejtë në treg dhe se për të përjashtuar garën në tenderin e hapur pak ditë më parë, Ministria e Brendshme ka përgjysmuar afatin minimal të parashikuar në ligj për t’u bërë pjesë e tenderit dhe për të plotësuar kushtet e tij.”

 


Leave a Reply

Your email address will not be published. Required fields are marked *