Gjendet trupi i pajetë i një studente në Universitetin e Kembrixh, e cila u hodh nga një avion gjatë vizitës së saj në Madagaskar.
Shefi i policisë i cili ka drejtuar kërkimin e Alana Cutland prej gati dy javësh, tha se fshatarët vendas e gjetën trupin e 19 vjeçares, dhe se ajo është identifikuar paraprakisht nga ngjyra e saj e flokëve, këpucët dhe veshjet.
Rreth 400 vendas dhe 15 policë kanë qenë në kërkim të studentes të Universitetit të Kembrixhit që nga 25 korriku, kur ajo raportohet se hapi derën e avionit me të cilin po fluturonte dhe shkoi drejt vdekjes së sigurt.
“MSN” shkruan se trupi u gjet në një zonë të largët, 12 ditë pasi ajo ra nga avioni gjatë kthimit për në shtëpi, pasi kishte studiuar gaforret për 8 ditë në një projekt në kuadër të diplomimit të saj.
Alana Cutland, e cila ishte në vitin e saj të dytë për shkenca natyrore, kishte dashur të kalonte gjashtë javë në udhëtim, por e shkurtoi atë në tetë ditë pasi foli me prindërit e saj, Alison dhe Neil.
Avionin e lehtë e kishin marrë me qira prindërit e saj, për t’i lehtësuar kthimin për në shtëpi. Autoritetet kishin paralajmëruar se trupi i të resë mund të mos gjendej, pasi kishte rënë në një zonë ku kishte shumë kafshë të egra.
