Më shumë se 300,000 libra janë hequr nga shkollat dhe bibliotekat turke dhe më pas janë shkatërruar që nga përpjekja për grusht shteti i vitit 2016, sipas ministrisë së Arsimit të Turqisë.
Ministri i arsimit i Turqisë, Ziya Selçuk njoftoi javën e kaluar se 301.878 libra ishin shkatërruar pas nismës së qeverisë për të goditur gjithçka që lidhet me Fethullah Gylen.
Gylen është kleriku mysliman, i cili akuzohet nga Turqia për nxitje të grushtit të shtetit të dështuar të vitit 2016. Por Gylen e ka mohuar përfshirjen e tij në grushtin e shtetit.
Shifrat u raportuan për herë të parë nga gazeta popullore Hürriyet, ndërsa gazeta online Kronos27 shfaqi disa fotografi të librave të sekuestruar dhe të djegur.
Sipas ëebsite- it “Turkey Purge”, që vetëcilësohet si “një grup i vogël gazetarësh të rinj që po përpiqen të jenë zëri i popullit turk në një regjim shtypës”, në 2016- n u ndalua rreptësisht një libër matematike thjesht për faktin se në një prej kërkesave të librit, gjendeshin inicalet e Gülen- it. Kështu, në ushtrim thuhej që studenti të shkonte nga pika F në pikën G, çka u konsiderua nga autoritet përkatëse krejtësisht e papranueshme dhe provokuese.
Në dhjetor të 2016- s, gazeta turke BurGun zbuloi se ishin shkatërruar 1.8 milionë libra shkollorë për t’u ribotuar më pas sërish, pasi përmbanin në tekst fjalën Pennsylvania, vendi ku aktualisht Gülen po jeton në SHBA.
Rrugët në Ankara që mbanin emrin e Gulen- it, janë riemërtuar gjithashtu.
Një raport i vitit 2018 nga English PEN zbuloi se, pas shpalljes së gjendjes së jashtëzakonshme, ishin mbyllur 200 media, 80 shkrimtarë u vunë nën hetim dhe 5.822 akademikë u pushuan nga 118 universitete publike. Raporti tregoi për një “krizë të lirisë së shprehjes” në Turqi.
“Ne u bëjmë thirrje autoriteteve turke të lejojnë rihapjen dhe funksionimin e pavarur të shtëpive botuese, dhe të ndalojnë urgjentisht goditjen e tyre të gjerë të lirisë së shprehjes, e cila vazhdon e pabarabartë.”, tha PEN.
VINI RE: Ky artikull është përshtatur në shqip pas publikimit nga “The Guardian”
