Një sasi e madhe heroine është kapur në portin e Durrësit. Policia ka vënë në pranga një 50-vjeçar, i cili drejtonte automjetin ku u gjet lënda narkotike.
Dyshohet se heroina e kapur ka qenë 11 kilogramë, e ndarë në 25 pako dhe ishte fshehur në gomën rezervë të mjetit me të cilën udhëtonte shtetasi me inicialet A.S, i cili banon në Zvicër.
DETAJET E POLICISË
Policia Kufitare parandalon dhe godet rast të tentativës për trafikim të drogave të forta
Sekuestrohen 11 kg lëndë narkotike, e dyshuar Heroinë.
Arrestohet në flagrancë një shtetas.
Shërbimet e Policisë Kufitare Durrës në zbatim të detyrave të përcaktuara në Planin e Masave për rritjen e kontrollit me qëllim parandalimin, evidentimin dhe goditjen e trafikimit të lëndëve narkotike, si dhe në bazë të analizës së riskut, kanë goditur një rast të tentativës për trafikim të lëndëve narkotike.
Gjatë kontrollit të ushtruar në vijën e dytë, në pikën e kontrollit të mjeteve, në mjetin tip Opel me drejtues shtetasin A. S. shërbimet e Policisë Kufitare duke përdorur edhe qenin antidrogë kanë konstatuar se në brendësi të automjetit kishte lëndë narkotike.
Menjëherë është njoftuar grupi hetimor dhe Specialistët për Hetimin e Narkotikëve në DVP Durrës.
Gjatë kontrollit të imtësishsëm të automjetit në gomën rezervë dhe në brendësi të vendit ku ajo vendoset, Policia gjeti dhe sekuestroi në cilësinë e provës materiale 25 pako me lëndë narkotike, me peshë 11 kg, e dyshuar Heroinë.
Në përfundim të veprimeve, Specialistët për Hetimin e Narkotikëve në Drejtorinë Vendore të Policisë Durrës bënë arrestimin në flagrancë të shtetasit A. S., 50 vjeç, banues në Zvicër, drejtuesi i mjetit.
Materialet hetimore i kaluan Prokurorisë Pranë Gjykatës së Shkallës së Parë Durrës, për veprime të mëtejshme, për veprën penale “Trafikimi i narkotikëve”.
