Drejtori i Përgjithshëm i Tesla-s, Elon Musk ka mohuar se e ka quajtur pedofil një zhytës britanik në “Twitter”.
Zhytësi 64-vjeçar Vern Unsworth, i cili ndihmoi në shpëtimin e 12 djemve tajlandezë nga një shpellë nënujore vitin e kaluar, e ka paditur Musk për shpifje.
Kjo sepse ky i fundit e kishte quajtur “djalë pedo” në rrjetet sociale.
Sherri nisi pasi Unsworth foli për Musk në një intervistë për CNN, ku u shpreh se nëndetësja e Musk dërguar në Tajlandë për të ndihmuar në shpëtimin e djemve nuk do të funksiononte dhe ishte thjesht një marifet për publicitet.
Më pas ai tha: “Musk ta fusë nëndetësen e tij atje ku i dhemb më shumë”.
I zemëruar, Musk u përgjigj në Twitter duke e quajtur atë “djalë pedo”. Por rrjeti gëloi nga kritikat dhe më vonë ai i fshiu postimet dhe kërkoi falje.
Por Unsworth ngriti një padi për shpifje kundër Musk në Los Angeles.
Në dokumentet gjyqësore, avokatët e Musk argumentuan se në Afrikën e Jugut, ku ai u rrit, shkurtimi “pedo” zakonisht përdoret për t’iu referuar një “plaku rrënqethës”.
Në dosjet gjyqësore Musk citohet të ketë thënë: “Pedo është sinonim me ‘plak rrënqethës” dhe përdoret për të fyer për pamjen dhe sjelljen e një personi, dhe nuk përdoret për të akuzuar një person për pedofili. “
Musk shtoi në dosjet e tij të gjykatës se ndihmësi i tij punësoi një hetues privat i cili “raportoi se z. Unsworth kishte lidhje me evropianë që merren me sjellje seksuale jo të rregullt në Tajlandë”.
Por Unsworth, i cili jeton pjesërisht në Tajlandë me partneren e tij, i ka mohuar të gjitha akuzat për keqbërje.
