Pas takimit me presidentin turk në Neë York, senatori republikan Lindsey Graham shprehu shpresën e tij për forcimin e marrëdhënies strategjike mes Ankarasë dhe Uashingtonit.
Rexhep Tajip Erdogan e priti senatorin e Karolinës së Jugut në Hotelin Peninsula. Duke folur para gazetarëve, Graham tha se takimi “ishte i mirë”.
“Jam shpresëplotë se mund të kemi një marrëdhënie më strategjike me Turqinë. Të përpiqemi t’i rikthejmë ato në programin F-35, mbase të flasim për programin e tregtisë së lirë.” – tha Graham.
“Sepse Turqia është një aleat shumë i rëndësishëm, jo vetëm kur bëhet fjalë për Sirinë, por për të gjithë rajonin”.
Në korrik, SHBA pezulloi përfshirjen e Turqisë në programin për avionët luftarakë F-35, duke thënë se blerja e programit rus të mbrojtjes raketore S-400 mund të rrezikonte aeroplanin, një pretendim që Turqia e ka mohuar vazhdimisht.
Graham e vlerësoi Turqinë si “të domosdoshme për mbajtjen e Sirisë të bashkuar” dhe ndihmën e saj në Sirinë verilindore për të parandaluar rishfaqjen e grupit terrorist ISIS.
“Më e rëndësishmja, Turqia po mbron 4 milion njerëz nga masakra,” shtoi ai.
Më 7 gusht, zyrtarët ushtarakë turq dhe amerikanë ranë dakord të krijojnë një zonë të sigurt në veri të Sirisë dhe të krijojnë një korridor paqeje për të lehtësuar lëvizjen e sirianëve të zhvendosur që duan të kthehen në shtëpi. Ata gjithashtu ranë dakord të krijojnë një qendër të përbashkët operacionesh.
