Ambasada amerikane ka përshëndetur vendimin e partive opozitare për t’u kthyer në tryezën e bisedimeve për sa i përket reformës zgjedhore.
Në një reagim në faqen zyrtare në Facebook, ambasada përshëndet gjithashtu kreun e PD-së, Basha, për thirrjen e një takimi të opozitës, veprim që sipas ambasadës amerikane tregojnë udhëheqësi të vërtetë për forcimin e institucioneve në vend.
Në reagimin e ambasadës theksohet gjithashtu SHBA mbështesin miratimin e reformave të nxitura nga ekspertët zgjedhorë të OSBE/ODIHR.
“Shtetet e Bashkuara mirëpresin vendimin e partive opozitare për të dërguar përfaqësues në konferencën për reformën zgjedhore bashkërenduar nga parlamenti dhe Prezenca e OSBE-së në Shqipëri. Ne përshëndesim Kryetarin e Partisë Demokratike Lulzim Basha që thirri një takim të opozitës dje. Përpjekjet e tij demonstrojnë udhëheqësi të vërtetë mbi një çështje thelbësore për forcimin e mëtejshëm të institucioneve demokratike të Shqipërisë. Shtetet e Bashkuara mbështesin miratimin e reformave të nxitura nga ekspertët zgjedhorë të OSBE/ODIHR në mënyrë që Shqipëria të mund të zhvillojë zgjedhje që janë të lira nga shtrëngimi, trysnia politike, dhe blerja e votes. Populli shqiptar nuk meriton asgjë më pak se sa kjo.”
