Dy persona janë arrestuar nga policia në Devoll, pas akuzave se kanë transportuar shtetas të huaj me qëllim kalimin e tyre të jashtëligjshëm drejt vendeve të BE-së.
Të arrestuarit janë dy vëllezër nga Tirana me inicialet: A. Ç., 53 vjeç dhe B. Ç., 46 vjeç.
Në makinën e tyre tip “Renault” ndodheshin katër shtetas të huaj, të cilët policia dyshon se po i transportonin në kërkim të vlerës prej 400 eurosh.
Detajet e policisë
Goditet një tjetër rast i transportimit të shtetasve të huaj, me qëllim kalimin e paligjshëm të tyre drejt vendeve të BE-së, kundrejt fitimit
Finalizohet operacioni policor i koduar “Bilishti”.
Arrestohen në flagrancë dy vëllezër.
Specialistët e Seksionit për Trafiqet e Paligjshme në Drejtorinë Vendore të Policisë Korçë, në bashkëpunim me shërbimet e Komisariatit të Policisë Bilisht, në vijim të punës për parandalimin, evidentimin dhe goditjen e veprimtarisë kriminale në fushën e dhënies së ndihmës shtetasve të huaj për kalim të paligjshëm të kufirit, kundrejt fitimit, me qëllim dërgimin drejt vendeve të BE-së, finalizuan një tjetër operacion, si rezultat i të cilit u bë kapja dhe arrestimi në flagrancë i shtetasve:
- Ç., 53 vjeç dhe B. Ç., 46 vjeç (i dënuar më parë për veprën pënale “Prodhimi dhe shitja e narkotikëve”), vëllezër, të dy banues në Tiranë.
Nga informacione të siguruara në rrugë policore, si edhe nga kontrollet që punonjësit e Komisariatit Bilisht ushtruan në afërsi të stadiumit, shtetasit e lartpërmendur u kapën me mjetin tip “Renault” duke transportuar në drejtim të Tiranës, katër shtetas të huaj, kundrejt fitimit 400 euro në total, shumë e cila u sekuestrua në cilësinë e provës materiale.
Materialet i kaluan Prokurorisë pranë Gykatës të Shkallës së Parë Korçë, për veprën penale “Ndihma për kalim të paligjshëm të kufijve, kryer në bashkëpunim”.
