Partia Demokratike ka reaguar zyrtarisht pas dërgimit në gjykatë të çështjes së lobimit dhe marrjes si të pandehur të kreut Basha e ish-Sekretarit të Përgjithshëm, Ristani.
Në deklaratën e PD-së thuhet se prokuroria e pushoi sot akuzën qesharake që e stisën e përdorënpër të goditur kundërshtarin politik.
‘Sot prokuroria vendosi pushimin e akuzës qesharake që e stisën dhe e përdorën për të goditur kundërshtarin politik sipas një strategjie të miratuar nga zyra e Edi Ramës. Pasi u keqpërdorën duke akuzuar zyrtarët e Partisë Demokratike për pastrim parash dhe përdorim të parave ruse, prokuroria sot u detyrua të pranojë se këto akuzave të stisura nuk qëndrojnë. E vërteta është se ishte Partia Demokratike që i kërkoi Prokurorisë hetimin e plotë dhe të gjithanshëm të financave dhe shpenzimeve të saj, e bindur se ka vepruar në përputhje të plotë me ligjin. Partia Demokratike ka deklaruar që ditën e parë se kjo akuzë u sajua nga Edi Rama për të zhurmuar skandalet korruptive të Qeverisë së tij dhe lidhjet me krimin e organizuar.’ – thuhet në deklaratë.
Më tej, në deklaratë theksohet se PD e ka bërë çdo gjë në transparencë të plotë dhe në përputhje me ligjin dhe kjo do shihet edhe gjatë seancave në gjykatë.
Aty thuhet gjithashtu se drejtësia e kontrolluar nga Rama nuk heton krimet e korrupsionin qeveritare por sajon akuza qesharake ndaj kundërshtarit politik të kryeministrit.
‘Partia Demokratike vlerëson faktin që pas 2 viteve të mbajtjes së kësaj çështje të hapur për qëllime propagande qeveritare, çështja është dërguar në gjyq. Tashmë shqiptarët do të kenë mundësi të njihen me dokumentet e plota, në seanca gjyqësore të hapura dhe transparente, ku do të provohet se Partia Demokratike ka bërë transparencë të plotë të financave të saj dhe ka deklaruar në përputhje me ligjin çdo shpenzim të kryer. Ndërkohë që partnerët strategjikë bëjnë thirrje për reforma që forcojnë pavarësinë e institucioneve, drejtësia e kontrolluar nga Edi Rama, nuk heton krimet dhe korrupsionin qeveritar, mbyll sytë përpara lidhjeve të krimit me politikën, dhe sajon akuza kundër kundërshtarit politik të Edi Ramës.’ – thuhet më tej.
Në fund të deklaratës zyrtare thuhet se sot është vërtetuar se nuk ka asnjë hetim në SHBA ndaj PD-së apo kompanisë së lobimit ndërsa i vetmi hetim në SHBA ka të bëjë me financimin e paligjshëm të Ramës për foton me ish-presidentn Obama.
‘Sot u vërtetua se nuk ka patur kurrë asnjë hetim në SHBA as ndaj Partisë Demokratike, as ndaj kompanisë së lobimit, as ndaj ndonjë zyrtari të Partisë Demokratike. Ajo ishte një sajesë e Edi Ramës, për të fshehur një tjetër hetim që po zhvillohej në SHBA. Në të vërtetë, në SHBA ka patur vetëm një hetim që lidhet me Shqipërinë dhe që ka përfunduar me dënimin e të paktën 2 personave, mbi financimin e paligjshëm të Edi Ramës. Edhe pse faktet janë bërë publike, edhe pse është depozituar kallëzim penal nga opozita, edhe pse dosja e drejtësisë amerikane është e plotë, edhe pse avokatët e personave të dënuar deklaruan që kanë vepruar për llogari të Edi Ramës, prokuroria shqiptare nuk ka kryer asnjë veprim. Prokuroria e kontrolluar prej Edi Ramës, as ka nisur hetime dhe as ka marrë të pandehur Edi Ramën për financim të paligjshëm, edhe pse ky fakt është provuar tashmë nga drejtësia’ – mbyllet deklarata.
