Për shkak të motit të keq dhe dallgëzimit në det janë shkaktuar probleme në dy portet në Vlorë dhe në Durrës. Në Vlorë lundrimi detar vijon të jetë i pezulluar.
Trageti i linjës Vlorë-Brindisi edhe sot nuk ka lundruar në drejtim të Vlorës, ndërsa anijet e peshkimit nuk janë lejuar nga Kapiteneria që të dalin në det.
Përsa i përket qarkullimit rrugor nuk ka patur probleme, por disa fshatra që prej ditës së djeshme kanë mbetur pa energji elektrike për shkak të dëmtimit të rrjetit.
Si pasojë e motit të keq sot asnjë traget nuk u nis nga Durrësi për në Bari apo anasjelltas. Era e fortë 74km/h, ka shkaktuar dallgë në det, që shkojnë deri në 7-8 ballë.
Përveç problemeve në port, deri më tani nuk raportohet për problematika të tjera në qytet apo në fshatrat përreth.
