Aleanca për Mbrojtjen e Teatrit ka publikuar një dokument ku tregohet se ka skaduar afati për tenderin e shpallur nga bashkia për ndërtimin e teatrit të ri kombëtar.
Kujtojmë se Bashkia e Tiranës në verë shpalli vendimin për tenderin e teatrit, por siç shihet nga ky dokument, nuk është bërë asnjë kërkesë nga ndonjë kompani për marrjen përsipër të projektit.
“Prej një muaj ka skaduar afati për shpalljen e vendimit të tenderit mbi projektin e Teatrit, që Bashkia shpalli gjatë verës.
Megjithëse kemi bërë një kërkesë për informacion për të marrë të gjithë dokumentet e paraqitura për tenderin, në shkelje të ligjit Bashkia refuzon ti dorëzojë ato.
E vërteta është që nuk ka as projekte, e as oferta, thjeshtë një përpjekje banale për të grabitur truallin publik nga dyshja Rama-Veliaj dhe klientët e tyre.”- thuhet në njoftimin e aleancës për Mbrojtjen e Teatrit.
Por pavarësisht se afati prej 31 ditësh ka skaduar me kohë, Veliaj herë pas here në mbledhjet e Këshillit Bashkiak është shprehur i bindur në shembjen e godinës së Teatrit aktual dhe ndërtimit të Teatrit të ri.
“Do të aplikojmë edhe koston e tarifën për teatrin e ri. Nuk ka iluzione, teatri do ndërtohet. Ndaj për ata që po lodhen te teatri, ruani energjinë”, tha Veliaj në një nga mbledhjet e Këshillit bashkiak.