Presidenti Ilir Meta nuk është vonuar për t’i kthyer përgjigje propozimit të kryeministrit Edi Rama, për të emëruar Arben Ahmetajn, si ministër për Rindërtimin.
“Asnjë sekondë vonesë për dekretimin e ministrit të ri të Shtetit për Rindërtimin”- shkruan zëdhënësi Tedi Blushi, duke lënë të kuptohet se presidenti Ilir Meta ka vendosur për dekretimin e Ahmetajt.
Kryeministri Rama e konsideroi të nevojshëm emërimin e një ministri të ri, për të çuar përpara procesin e rindërtimit pas tërmetit të fuqishëm të 26 nëntorit.
“Programi i Rindërtimit dikton hapjen e një vendi të posaçëm edhe në tryezën e Këshillit të Ministrave, ku një ministër i ngarkuar ekskluzivisht me koordinimin e të gjitha institucioneve vendase e ndërkombëtare që lidhen me këtë program, të ndjekë orë e minutë zbatimin e Programit”– shkruante Rama pak më herët.
Arben Ahmetaj ka qenë ministër i Zhvillimit Ekonomik, Turizmit, Tregtisë dhe Sipërmarrjes në vitet 2013-2015. Më vonë në vitin 2016, Rama e emëroi atë si ministrin e ri të Financave, pozicion të cilin e ka mbajtur deri në janar të këtij viti, kur kryeministri ndryshoi gjysmën e qeverisë pas protestave të studentëve./Hashtag.al
