Kreu i Partisë Demokratike Lulzim Basha ka reaguar pas votimit në kuvend të ligjit anti shpifje.
Basha deklaron se ky ligj u miratua me urgjencë pasi kryeministri Rama po përgatit vjedhjen e radhës dhe këtë herë sipas tij është mbi rrënojat e tërmetit të 26 nëntorit.
“Sot kur po zbardhet përditë e më qartë përgjegjësia e zyrtarëve të kësaj qeverie për 24 jetët e humbura në Thumanë, me urgjencë miratohet ligji kundër fjalës së lirë.
Sot kur priten te fillojnë hetimet për shitblerjen e votave në Durrës dhe Dibër, për mega skandalin e Unazës së Re, për dështimin e qeverisë në menaxhimin e krizës së tërmeteve të 21 shtatorit dhe 26 nëntorit, miratohet me urgjencë ligji që do ti ndalojë portalet të publikojnë këto fakte.
Miratimi i ligjit kundër fjalës së lirë u bë me urgjencë sot sepse qeveria Rama po përgatit vjedhjen e radhës, kësaj here mbi rrënojat e tërmetit të 26 nëntorit.”-shkruan Basha në rrjetet sociale.
Basha, më tej, i ka bërë thirrje Presidentit të Repiblikës, Ilir Meta, që të mos dekretojë këtë ligj të cilin e ai quan atentat ndaj fjalës së lirë.
“I bëj thirrje Presidentit të Republikës të mos e dekretojë këtë atentat kundër fjalës së lirë që rikthen ligjin famëkeq të diktaturës për agjitacion e propagandë.
Ky akt i turpshëm dhe kriminal e çon vendin dhe qytetarët shqiptarë shumë hapa pas në rrugën e integrimit europian dhe sjell pasoja të rënda për të ardhmen e tyre”-vazhdon Basha.
Gjithashti kreu i demokratëve ka kërkuar prej gazetarëve të mos intimidohen por të vazhdojnë denoncimet e aferave apo skandaleve të mundshme të qeverisë.
“Partia Demokratike do të vazhdojë të denoncojë me zë dhe me figurë çdo skandal, çdo fakt abuziv, çdo dështim të radhës të këtij kryeministri në ikje!
Ju bëj thirrje të gjithë gazetarëve dhe analistëve, të gjithë opinionistëve dhe personave publikë të mos intimidohen dhe të vazhdojnë bashkë me opozitën të denoncojnë çdo aferë dhe skandal të kësaj qeverie në ikje!
Asgjë dhe askush nuk do na e mbyllë dot gojën!”-përfundon kreu i PD-së.
