Tre djem të rinj janë vënë në pranga nga policia në Fier, gjatë një operacioni për kapjen e personave me rrezikshmëri të lartë shoqërore. Të rinjtë po udhëtonin me makinë në momentin kur u ndaluan nga uniformat blu.
Në automjetin e blinduar tip “Audi A8”, u gjetën dy pistoleta dhe 2 krehëra me 24 fishekë poshtë sediljes së parë të pasagjerit. Po ashtu dy prej tyre iu gjet edhe nga një thikë.
DETAJET E POLICISË
Operacion për kapjen e personave me rrezikshmëri të lartë shoqërore.
Finalizohet operacioni policor i koduar”Çlirimi”.
Vihen në pranga 3 persona me precedent penal në fushën e krimeve kundër personit, pronës dhe armëmbajtjes pa leje.
Sekuestrohen 2 armë zjarri, municion luftarak, 2 armë të ftohta dhe 1 makinë e blinduar.
Në zbatim të planit të masave për kontrollin e territorit, kapjen e personave që qarkullojnë me armë zjarri dhe në vijim të punës për parandalimin dhe goditjen e paligjshmërisë, si edhe nga informacionet e mara në rrugë operative, Policia bëri të mundur arrestimin në flagrancë të shtetasve:
- Sh. K., 33 vjeç, banues në Fier, i dënuar më parë për armëmbajtje pa leje;
- A. B., 35 vjeç, banues në Fier;
- R. L., 20 vjeç, banues në Fier;
Gjatë kontrollit të ushtruar nga strukturat e DVP Fier, në fshatin Çlirim, Fier, në mjetin e blinduar Audi A8, i cili drejtohej nga shtetasi R. L., poshtë sediljes së parë të pasagjerit, ku ishte ulur shtetasi Sh. K., u gjetën dhe sekuestruan 2 armë zjarri tip pistoletë dhe 2 krehëra me 24 fishekë.
Gjatë kontrollit personal, shtetasit R. L. iu gjet dhe sekuestrua një mjet prerës (thikë), që e kishte në çantën e dorës.
Gjithashtu, gjatë kontrollit personal të ushtruar ndaj shtetasit A. B., u gjet dhe u sekuestrua një mjet prerës (thikë).
U sekuestruan në cilësinë e provës materiale 2 pistoleta, 2 krehëra me 24 fishekë, 2 mjetet prerëse dhe automjeti i blinduar Audi A8.
Materialet i kaluan Prokurorisë pranë Gjykatës së Shkallës Parë Fier, për veprat penale “Armëmbajtje pa leje” dhe “Mbajtja pa leje e armëve të ftohta”.
