Numri i madh i rasteve të abuzimit seksual, të mbërritura në Vatikan, kërcënon të trondisë zyrën e doktrinës (CDF) përgjegjëse për përpunimin e tyre, sipas monsinjorit irlandez përgjegjës.
Duke folur me Associated Press (AP), Imzot John Kennedy, i cili kryeson seksionin e disiplinës së CDF, tha se një rekord prej 1.000 rastesh mbërritën nga e gjithë bota gjatë vitit 2019.
‘Ne po shohim një numër të madh rastesh për momentin, veçanërisht nga vendet ku nuk kemi dëgjuar kurrë më parë’, tha Kennedy, ndërsa sqaroi se shumica e akuzave për abuzim i referohen incidenteve që ndodhën vite apo edhe dekada më parë.
Në 2001, Vatikani e përqendroi përgjegjësinë për të shqyrtuar pretendimet e abuzimit te CDF-ja, por numri i çështjeve është katërfishuar gjatë dekadës së kaluar ndërsa numri i stafit ka qëndruar afërsisht i njëjtë, me gjithsej vetëm 17 zyrtarë.
Sipas procedurave të përditësuara, peshkopët dhe eprorët fetarë që marrin një akuzë për abuzim klerik duhet të kryejnë një hetim paraprak.
Nëse pretendimet rezultojnë të besueshme, dokumentacioni i dërgohet Vatikanit, i cili do të informojë peshkopin se si të procedojë: kalimin në një gjykim të plotë kanonik, një procedurë administrative më e përshpejtuar ose diçka tjetër. Në disa raste, vetë CDF-ja merr përsipër hetimin.
