Kreu i Partisë Demokratike, Basha, ka theksuar në urimin e tij për festat e fundvitit se viti që shkoi i përballi shqiptarët me sfida të shumta, duke përmendur tërmetin e 26 nëntorit.
Ai theksoi se përveç 51 viktimave, dhjetëra mijëra të tjerë e kalojnë natën e sotme mes vështirësish,. Në të ftohtë e me tavolina të zbrazura.
‘Të dashur bashkëqytetarë, Vetëm pak orë na ndajnë nga ndërrimi i viteve dhe unë nga zemra dua t’ju uroj të gjithëve, kudo ku jeni: Për shumë vjet Gëzuar!
Viti që po lemë pas ishte i vështirë, dhe na përballi me sfida të shumta.
Tërmeti që goditi vendin tonë e vështirësoi edhe më shumë jetën e mijëra familjeve. 26 nëntori gjunjëzoi vendin dhe la pas një dhimbje të madhe për 51 bashkëqytetarë që sot nuk janë më mes nesh, dhe për dhjetëra mijëra të tjerë që po e kalojnë këtë natë mes vështirësish, në të ftohtë, me tavolina të zbrazura e dhimbje në shpirt.’ – thotë Basha.
Më tej, kryedemokrati uron që viti 2019 të marrë me vete dhimbjen, pamundësinë dhe krizën që përjetuan shqiptarët.
Një urim të veçantë Basha e ka për familjet e prekura nga tërmeti, që janë prekur më së shumti nga dëmet.
‘Ky vit do të mbetet gjatë në mendjen e çdo qytetari, e kjo natë natyrisht nuk do të festohet si çdo vit.
Por ajo që dëshiroj me shpirt e për të cilën lutemi të gjithë është që 2019 të marrë me vete gjithë dhimbjen, pamundësinë dhe krizën që përjetuam, e viti i ri të sjellë mbarësi, gëzim, e më shumë mirëqenie në çdo vatër shqiptare. Së bashku si një familje e madhe me ndihmën e Zotit dhe duke u mbeshtetur tek njëri tjetri do ta ndryshojmë këtë realitet të dhimbshëm në vitin që po vjen.
Sot dua të uroj nga zemra çdo qytetar që është në vështirësi që 2020 të sjellë lehtesim, shpresë dhe mirëqenie për ta. Dua të uroj çdo shqiptar që gjendet në emigrim që 2020 të sjellë ditë më të mira, dhe mundësi që të ktheheni e të ndërtoni siç e dëshironi jetën tuaj në Shqipëri! Dua të uroj sot çdo familje të prekur nga tërmeti që 2020 tu sjellë mbylljen e plagëve në familjet tuaja dhe tejkalim te vështirësive.’ – shton Basha.
Në fund Basha ka një urim të veçantë për ekipet mjekësore , policinë, zjarrfikësit e gazetarët që janë në krye të detyrës si dhe për të rinjtë e të rejat e vendit.
‘Dua të uroj sot në veçanti ekipet mjekësore, punonjësit në detyrë të policisë, zjarrfikësit si dhe punonjësit e medias që janë në krye të detyrës, një vit të mbarë e të gëzuar! Një urim të veçantë kam për të rinjtë dhe të rejat, mos e humbisni shpresën dhe besimin tek vetja juaj dhe tek Shqipëria! Forca dhe energjia juaj është frymëzim për çdo shqiptar. Së bashku do ta bëjmë Shqipërine vendin e mundësive për të gjithë ju. Gëzuar e një vit të mbarë për çdo shqiptar! Zoti e bekoftë Shqiperinë!’ – mbyll urimin Basha.
