Autoriteti i Aviacionit Civil ka shpërndarë një njoftim për të gjithë qytetarët që kanë prerë bileta dhe kanë planifikuar të udhëtojnë me kompaninë ajrore Ernest, pas pezullimit të licencës së saj nga autoritetet italiane.
Sipas AAC-së, kompania italiane i ka pakësuar fluturimet por nuk i ka ndërprerë krejtësisht ato deri në datën 13 janar, kur do vendoset nëse do rinisë punën me kapacitet të plotë apo do pezullohet më tej.
‘Pas njoftimit nga Autoriteti Italian i Aviacionit Civil (ENAC) për pezullimin e licencës së kompanisë “Ernest”, si autoriteti përgjegjës për licencimin e kësaj kompanie, Autoriteti Aviacionit Civil Shqiptar (AAC), i dërgoi një kërkesë sqaruese ENAC dhe u informuam se për shkak të vështirësive financiare me likuiditetin e kompanisë, autoriteti italian ishte detyruar të merrte këtë vendim me shpresën se kompania, deri me datë 13 Janar 2020, do jetë në gjendje të vërtetojë garanci financiare të nevojshme për vijimin e aktivitetit. Kompania “Ernest” nga ana e saj iu përgjigj AAC-së, se do të angazhohej në marrjen e masave të nevojshme për garantimin e zhvillimit të fluturimeve të programuara deri më datë 13 janar. Për sa më sipër, që nga momenti i njoftimit për pezullim, kompania është duke operuar me kapacitet të kufizuar në avionë dhe staf operues. Kjo situatë ka sjellë edhe anulime dhe ri-skedulime të fluturimeve, por jo deri në pikën e ndalimit total të fluturimeve.’ – thuhet në njoftim.
Më tej AAC-ja udhëzon udhëtarët shqiptarë që të kontaktojnë me shërbimin për klientin të kompanisë e të përpiqen të sigurojnë një vend në fluturimet që po kryhen nga kompania.
Në rast se nuk arrijnë dot ta sigurojnë fluturimin, atëherë mund të kërkojnë rimbursim në faqen e kompanisë.
‘Duke qenë se kompania ende ka një licence aktive nga autoriteti italian deri më dt. 13/01, pasagjerët duhet të marrin masat që deri në këtë datë të lidhen në telefon me shërbimin e klientit të kompanisë dhe/ose agjencinë ku kanë prerë biletën dhe të përpiqen të sigurojnë një vend në fluturimet që kompania po kryen. Nëse pasagjerët nuk e kryejnë dot fluturimin me Ernest dhe zgjedhin të presin një biletë me një kompani tjetër, atyre u rekomandohet të bëjnë kërkesën për rimbursim dhe kompensim nëpërmjet sistemit të kompanisë në faqen e tyre në internet në adresën:
https://form.jotformeu.com/82412077858362
Kërkesën për rimbursim duhet t’a bëjnë edhe pasagjerët që kanë prerë bileta përtej datës 13 Janar 2020.’ – vijon njoftimi.
Autoriteti i Aviacionit Civil bën gjithashtu me dije se udhëtarët duhet të bëjnë kërkesë për rimbursim e kompensim pasi është i vetmi mekanizëm mbrojës sipas ligjit të BE-së.
Ajo thekson gjithashtu se është në kontakt me autoritetet italiane për të garantuar respektimin e të drejtave të udhëtarëve të prekur.
‘Është shumë e rëndësishme që pasagjerët të bëjnë kërkesat për rimbursim dhe kompensim si i vetmi mekanizëm mbrojtës në dispozicionin e tyre sipas ligjit të BE-së. Në rast se kompania do dështoj t’i tregoj autoritetit Italian, aftësinë për të mbajtur të vlefshme licencën e operimit, bazuar në legjislacionin e shtetit fqinj, asaj do i duhet të zbatoj hapat e mëtejshëm sipas legjislacionit italian. Në lidhje me rimbursimet dhe/ose kompensimet në rast se kjo ndodh, pasagjerët këshillohen të zbatojnë udhëzimet që do të dalin në vijim nga autoriteti italian dhe/ose entitete të tjera shtetërore në vendin fqinj. AAC është duke ndjekur situatën e kompanisë italiane “Ernest” dhe do të kërkoj në vazhdimësi kompanisë dhe autoriteteve italiane, garantimin e respektimit të të drejtave të pasagjerëve të prekur, si autoriteti përgjegjës për licencimin e kësaj kompanie. AAC në përputhje me legjislacionin evropian dhe shqiptar, që rregullon të drejtat e pasagjerit, në një situatë sikurse po kalon kompania italiane, do publikoj rast pas rasti informacione të përditësuara me qëllim që të ndihmojmë pasagjerët në vendimmarrjet e tyre.’ – mbyllet njoftimi.
