Një aeroplan pasagjerësh nga Ukraina është përplasur afër Teheranit vetëm disa orë pasi Irani nisi një sulm me raketa balistike në bazat amerikane në Irak, në shenjë hakmarrjeje për vrasjen e Qassem Soleimani.
Siç shkruan Daily Mail, në bord ndodheshin mbi 170 pasagjerë dhe anëtarë të ekuipazhit dhe asnjëri nuk ka mundur dot të mbijetojë.
Avioni u rrëzua në orët e para të mëngjesit të së mërkurës, vetëm tre minuta pas nisjes nga Aeroporti Ndërkombëtar i Imam Khomeini, duke vrarë të gjithë 167 pasagjerë dhe nëntë anëtarët e ekuipazhit.
Pamjet në video nga vendngjarja, tregojnë avionin duke u djegur në qiell para se të rrëzohej pas një shpërthimi masiv, duke shkaktuar spekulime se avioni mund të ishte qëlluar.
Spekulimet se avioni u qëllua aksidentalisht nga ushtarët e mbrojtjes ajrore iraniane, vijnë disa orë pasi Irani hodhi 15 raketa balistike në bazat amerikane në Irak.
Rrëzimi i avionit është një zhvillim dramatik dhe do të rrisë tensionet nëse vërtetohet se është shkatërruar nga iranianët.
Fotografitë e botuara më vonë nga agjensia shtetërore e lajmeve në Iran, IRNA, tregojnë ekipet e emergjencave në një fushë në fermë ku ndodheshin pjesë të mbetura të avionit.
