Foto Ilustruese
REL raporton se qytetarët rusë janë evakuuar nga universitetet, shkollat, muzetë dhe teatrot në të paktën gjashtë qytete në Lindjen e Largët të Rusisë këtë 13 janar, për shkak të raporteve për pajisje eksplozive të vendosura në ndërtesa.
Rreth 50,000 fëmijë dhe 3.500 mësues dhe pjesëtarë të tjerë të stafit u evakuuan nga shkollat dhe kopshtet në Khabarovsk, i cili ndodhet afër kufirit kinez, ndërkohë që termometri shënon deri në -22 gradë Celsius.
Në qytetin portual të Vladivostok, u evakuuan qytetarët në mbi 10 institucione arsimore dhe dy teatro.
Raporte të ngjashme për bomba u bënë në verilindje në Komsomolsk-on-Amur, Ussuriysk, Birobidzhan dhe Blagoveshchensk, një qytet me më shumë se 200,000 njerëz.
Raportimet për bombë nuk kanë munguar as në kryeqytet. Agjencia e lajmeve në Rusi, Tass raporton për një kërcënim me bombë pranë një gjykate në Moskë.
Gjykata Basmanny e Moskës po evakuohet dhe të gjithë vizitorët dhe punonjësit janë larguar nga ndërtesa.
Gjykata Basmanny i tha TASS se gjykatat Zamoskvoretsky, Khoroshevsky, Timiryazevsky, Chertanovsky, Lyublinsky, Golovinsky, Nikulinsky, Koptevsky dhe Troitsky ishin evakuuar gjithashtu.
Në dhjetor, pati evakuime masive të ngjashme nga kopshtet, shkollat, universitetet dhe institucionet e tjera në Lindjen e Largët të Rusisë për shkak të kërcënimeve për shpërthime. Asnjë nga kërcënimet për bombë nuk u konfirmua.
