Konferenca e paqes në Libi u pajtua mbi hapat e rinj për të mbështetur armëpushimin dhe për të vëzhguar embargon e armëve, tha të dielën kancelarja Angela Merkel.
Duke folur në një konferencë për shtyp në fund të konferencës që mblodhi forcat botërore dhe aktorët rajonalë, Merkel tha se të gjithë pjesëmarrësit ranë dakord se nuk mund të kishte zgjidhje ushtarake për konfliktin libian.
‘Ne arritëm një marrëveshje për një plan gjithëpërfshirës,’ tha ajo, duke shtuar se ata gjithashtu ranë dakord për masa të reja për të respektuar rreptësisht embargon e armëve.
Merkel tha se palët ndërluftuese gjithashtu ranë dakord të caktojnë anëtarë në një komision ushtarak me pesë anëtarë nga secila anë, siç parashikohet nga Kombet e Bashkuara, për të monitoruar zbatimin e armëpushimit.
Që nga rrëzimi i sundimtarit libian, Muammar Gaddafi në 2011, dy grupe janë shfaqur në Libi: Gjenerali Khalifa Haftar që vepron në lindje të Libisë, i mbështetur kryesisht nga Egjipti dhe Emiratet e Bashkuara Arabe, dhe Qeveria e Akordit Kombëtar (GNA) në Tripoli, e cila gëzon mbështetjen e Kombeve të Bashkuara dhe njohje ndërkombëtare.
3 vendimet që u morën
Sekretari i Përgjithshëm i Kombeve të Bashkuara, Antonio Guterres, theksoi tre pikat e arritura në samit, duke thënë:
‘Së pari, më duhet të theksoj në përfundim të samitit se nuk ka asnjë zgjidhje ushtarake për konfliktin në Libi. Të gjithë pjesëmarrësit e angazhuar të përmbahen nga ndërhyrja në konfliktin e armatosur ose punët e brendshme të Libisë.
Së dyti, ne u bëmë thirrje të gjithë aktorëve që të përmbahen nga çdo veprimtari që përkeqëson konfliktin.
Së treti, kthimi në procesin politik është thelbësor.’
